तडे गेलेल्या द्राक्षांची खरेदी; वाईनसाठी होणार वापर 

नाशिक : कसमादे पट्ट्यातील पूर्वहंगामी द्राक्ष प्लॉट काढणीसाठी आले असताना पावसामुळे येथील बागांचे मोठ्या प्रमाणावर नुकसान झाले आहे. तयार झालेल्या द्राक्षांना पावसामुळे तडे गेल्याने ही द्राक्षे अक्षरशः फेकून देण्याची वेळ शेतकऱ्यांवर आली आहे. मात्र, पिंपळगाव बसवंत येथील सायलो वाईनचे संचालक विश्‍वास माधवराव मोरे यांनी तडे गेलेली द्राक्षे वाइन निर्मितीसाठी खरेदी करण्याचा निर्णय घेतला आहे. त्यामुळे त्यांच्या व्यवस्थापनाकडून शेतकऱ्यांची तडे गेलेली द्राक्ष पिंपळगाव बसवंत येथे सायलो वाईनरीत दाखल होत आहे. परिणामी, नुकसानग्रस्त द्राक्ष उत्पादकांना थोडा फार आधार मिळाला आहे. 

कसमादे भागात रंगीत व सफेद वाणांच्या द्राक्षबागा आहेत. मात्र, सततच्या पावसामुळे द्राक्षांना तडे गेल्याने माल मोठ्या प्रमाणावर खराब झाला आहे. त्यामुळे उत्पादन येऊनही हा माल फेकून द्यावा लागत आहे. अशा परिस्थितीत व्यापारी शेतकऱ्यांकडून माल खरेदी करण्यास नकार देत आहेत. त्यामुळे विश्वासराव मोरे यांनी वाइननिर्मितीसाठी प्रक्रियायोग्य माल खरेदीचा निर्णय घेतला आहे. त्यामुळे ज्या मालाची प्रत थोडीफार चांगली आहे. असा माल खरेदी करण्यात येत आहे. 

शेतकऱ्यांवर कर्जाचा डोंगर वाढला आहे. त्यामुळे शेतकरी संघटनेचे ज्येष्ठ नेते व वाइन उद्योगाचे जनक माधवराव खंडेराव मोरे यांचे चिरंजीव आणि सायलो वाइनचे संचालक विश्वासराव मोरे यांनी शेतकऱ्यांकडील द्राक्षे चांगल्या भावात खरेदी करण्याचा निर्णय घेऊन शेतकऱ्यांना दिलासा प्रयत्न केला आहे. त्यानुसार सटाणा भागातून अनेक शेतकरी आता द्राक्ष पिंपळगाव बसवंत येथील सायलो वाइनकडे रवाना करत आहे. द्राक्ष क्रशिंग व वाइननिर्मितीचा हंगाम  नसतानाही विश्वासराव मोरे यांनी परिश्रम घेऊन आपल्या प्रकल्पात द्राक्षांवर प्रक्रिया सुरू केली आहे.