कापूस लागवड न करणाऱ्यांना मिळाली मदत; घोळ सुरुच

मी मागील २५ वर्षे पूर्वहंगामी कापूस घेत आहे. मागील वर्षी माझ्या दीड हेक्‍टर क्षेत्रावरील कापसावर गुलाबी बोंड अळीचा प्रादुर्भाव झाली. मी मदतनिधीसंबंधी महसूल व कृषी विभागाकडे अर्ज दिला. पण माझे नावच मदतनिधीच्या यादीत आले नाही. पण आमच्याकडे जे शेतकरी घरी जमीन करीत नाही, जे आपली जमीन लीजवर देतात. कधी पूर्वहंगामी कापूस लावत नाहीत, त्यांना पूर्वहंगामी कापूस नुकसानीसंबंधी मदतनिधी मिळत आहे. हा प्रकार शासनाने गांभीर्याने घ्यावा. - एक शेतकरी , कानळदा, जि. जळगाव.
संग्रहित छायाचित्र
संग्रहित छायाचित्र

जळगाव  ः जिल्ह्यात मागील हंगामात बोंड अळीमुळे नुकसान झालेल्या कापूस उत्पादकांना मदतनिधीचे वाटप सुरू झाले आहे. परंतु जळगाव, धरणगाव या तालुक्‍यांत मोठा घोळ झाला असून, ज्यांनी कापसाची लागवड केली नव्हती व स्वतः शेती न करणाऱ्या शेतकऱ्यांनाही हा निधी मिळाला आहे. मात्र जे शेतकरी वर्षानुवर्षे पूर्वहंगामी कापसाचे उत्पादन घेत आहेत त्यांचे नाव मदतनिधीच्या यादीतच नाही.

बोंड अळीमुळे झालेल्या नुकसानीच्या मदतीपासून वंचित राहिलेले शेतकरी बॅंक व तलाठी यांच्याकडे चकरा मारत आहेत. जिल्ह्यात सर्वत्र निधीचे वितरण झाले. सर्वात शेवटी जळगाव व धरणगाव या तालुक्‍यांत वितरण सुरू झाले. परंतु वितरणात घोळ झाल्याने कापूस उत्पादकांना मनःस्ताप सहन करावा लागत आहे. मध्यंतरी शेतकरी तक्रार करायचे, तहसीलदार यांच्याशी संपर्क साधायचे, पण तहसीलदार ऐकून घेत नव्हते.

मोठ्या प्रतीक्षेनंतर निधी बॅंकांमध्ये आला, पण अनेक कापूस उत्पादकांनी अर्ज भरूनही, सर्व कागदपत्रे जोडूनही त्यांना हा  मदतनिधी प्राप्त झालेला नाही. काही शेतकरी बुधवारी (ता. १४) सायंकाळी तहसीलदार कार्यालयात गेले, पण तलाठी भेटले नाही. तलाठी यांचे संबंधित गावात काम पाहणारे झिरो तलाठी यांच्याकडे शेतकऱ्यांना जावे लागले. झिरो तलाठ्यांनी मात्र तलाठी यांची भेट घ्यावी लागेल, अशी हतबलता दाखविली. काही शेतकऱ्यांनी तलाठ्यांशी संपर्क साधला असता बॅंकेत संपर्क करा, आपले नाव तर यादीत आहे, बॅंक खाते क्रमांकही आहे, असे तलाठ्यांनी सांगितले. तर बॅंकेत मात्र आपले नावच यादीत नाहे, असे संबंधित शेतकऱ्यांना सांगण्यात आले.

जळगाव तालुक्‍यात कानळदा, भोकर, नांद्रा बुद्रूक, आव्हाणे तर धरणगावात पाळधी, सोनवद भागात शेतकऱ्यांच्या अधिक तक्रारी आहेत. यासंदर्भात चौकशी करून पुढील कार्यवाही प्रशासनाने करावी, अशी मागणी शेतकरी करीत आहेत.  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com