‘अजिंक्यतारा’कडून एफआरपीचा दुसरा हप्ता खात्यात वर्ग 

सातारा : कोरोनाच्या पार्श्वभूमीवर अडचणीत सापडलेल्या ऊस उत्पादकांना दिलासा देत अजिंक्यतारा साखर कारखान्याने ३१ मार्चपर्यंत गाळपास आलेल्या ऊसाला प्रतिटन १५० रूपयाप्रमाणे ऊस पेमेंट संबंधीत शेतकऱ्यांचे बँक खाती वर्ग केले, असे कारखान्याचे मार्गदर्शक संचालक, आमदार शिवेंद्रसिंहराजे भोसले यांनी सांगितले. 

अजिंक्यतारा कारखान्याचा चालू गळीत हंगाम अंतीम टप्यात असून या हंगामाकरिता केंद्र शासनाने निर्धारीत केलेल्या सूत्रानुसार एफआरपी प्रतिटन २७९० रूपये जाहिर केली आहे. या वर्षी गाळपास आलेल्या ऊसाला पहिली उचल प्रतिटन २५०० रूपयांप्रमाणे १५ एप्रिलपर्यंत संबंधीत शेतकऱ्यांच्या बँक खात्यात वर्ग करण्यात आलेली आहे. तसेच दुसऱ्या हप्तापोटी ३१ मार्चपर्यंत एकूण चार लाख ९५ हजार ५३० टन गाळप झालेल्या ऊसाला प्रतिटन १५० रूपयांप्रमाणे एकूण ७ कोटी ४३ लाख ३० हजार १२ रूपये पेमेंट मंगळवारी (ता. २२) संबंधित शेतकऱ्यांच्या बँक खात्यात वर्ग करण्यात आले आहेत, अशी माहिती आमदार शिवेंद्रसिंहराजे भोसले यांनी दिली. 

आमदार भोसले म्हणाले, कि मागील वर्षीसुध्दा ऊसाचे पेमेंट वेळेत आदा केल्यामुळे साखर आयुक्तांनी पत्राद्वारे संचालक मंडळाचे अभिनंदन करून कौतुक केले होते. याही हंगामात सुध्दा एफआरपीप्रमाणे उर्वरित देय पेमेंट लवकरच आदा करण्यासाठी तसे आर्थिक नियोजन व्यवस्थापनाने केले आहे. 

‘‘कारखान्याने आत्तापर्यंत ५ लाख ७७ हजार ३५० टनाचे गाळप करून सरासरी १२.४९ टक्के साखर उताऱ्याने ७ लाख १७ हजार ७९० क्विंटल साखर उत्पादित केली असून कारखान्याचा गळीत हंगाम अंतीम टप्प्यात आहे. अद्यापही कारखान्याकडे ४० हजार टन ऊस शिल्लक असून एप्रिलअखेर गाळप पूर्ण होईल. म्हणजेच या हंगामात अंदाजे एकूण ६ लाख १० हजार टनाचे गाळप पूर्ण होईल,’’ असे कार्यकारी संचालक संजीव देसाई यांनी सांगितले.