अमरावती जिल्ह्यात सोयाबीन कंपन्यांकडून शेतकऱ्यांना ३१ लाखांची भरपाई

जिल्ह्यात सोयाबीन उगवण विषयक ९५ कंपन्यांविरोधात ४ हजार ६०६ तक्रारी कृषी विभागाला प्राप्त झाल्या होत्या. बियाणे कंपन्यांनी आत्तापर्यंत शेतकऱ्यांना ८९३ बियाणे बॅग बदलून दिल्या तर ३१ लाख १३ हजार रुपये शेतकऱ्यांच्या खात्यात जमा केले आहेत.
soybean
soybean

अमरावती : जिल्ह्यात सोयाबीन उगवण विषयक ९५ कंपन्यांविरोधात ४ हजार ६०६ तक्रारी कृषी विभागाला प्राप्त झाल्या होत्या. बियाणे कंपन्यांनी आत्तापर्यंत शेतकऱ्यांना ८९३ बियाणे बॅग बदलून दिल्या तर ३१ लाख १३ हजार रुपये शेतकऱ्यांच्या खात्यात जमा केले आहेत. उर्वरित प्रकरणांत परतावा न मिळाल्यास संबंधित कंपन्यांविरोधात एफआयआर दाखल करण्याचा इशारा देण्यात आला आहे.    जिल्ह्यात सुरुवातीला रोहिणी नक्षत्रात झालेला मान्सूनपूर्व पाऊस व त्यानंतर मृग नक्षत्राच्या मध्यात काही भागात समाधानकारक पाऊस झाल्याने शेतकऱ्यांनी सोयाबीन पेरणीची लगबग केली. परंतु सोयाबीन बियाण्याचे अनेक लॉट निकृष्ट दर्जाचे निघाल्याने शेतकऱ्यांवर दुबार पेरणीची वेळ आली. जिल्ह्यात किमान दहा हजार एकरावर दुबार पेरणी झाल्याचे सूत्रांनी सांगितले. त्यामुळे ऐन पेरणीच्या हंगामात शेतकरी आर्थिक अडचणीत आले आहेत.  निकृष्ट दर्जाच्या सोयाबीन विषयक ४ हजार ६०६ शेतकऱ्यांनी तक्रारी दाखल केल्या आहेत. विशेष म्हणजे महाराष्ट्र राज्य बियाणे महामंडळाविरोधात सर्वाधिक १ हजार ९३४ तक्रारी आहेत. सुरुवातीला बियाणे कंपन्यांद्वारे शेतकऱ्यांना भरपाई देण्यास नकार देण्यात आला. त्यानंतर शासनाने कंपन्यांविरोधात कारवाईचा बडगा उगारल्याने कंपन्यांनी भरपाईस सहमती दर्शवली.  आत्तापर्यंत पाहणीपूर्वी ५१ तक्रारी मागे घेण्यात आल्याचे कृषी विभागाने सांगितले. कंपन्यांनी ८९३ बॅग बियाणे बदलून दिले तर ३१ लाख १३ हजार पन्नास रुपये भरपाई दिली आहे.  ६४१ प्रकरणांत भरपाई तालुकास्तरीय तक्रार निवारण समित्यांनी ४ हजार २१८ तक्रारींची पाहणी केली असता २ हजार ५१८ तक्रारींमध्ये तथ्य आढळून आले, तर २ हजार ५९८ तक्रारींमध्ये बियाणे सदोष असल्याचा निर्वाळा देण्यात आला आहे. यापैकी ६४१ प्रकरणात कंपनीद्वारे नुकसान भरपाई मिळाली आहे. प्रलंबित असलेल्या ३८८ तक्रारींची पाहणी करण्यात आली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com