लॉकडाऊनमधून बियाणे उद्योग वगळला

पुणे : शेतकऱ्यांना बियाण्यांचा पुरवठा सुरळीत होण्यासाठी राज्यातील बियाणे उद्योगातील कर्मचाऱ्यांना लॉकडाऊनमधून वगळण्यात आले आहे. 

कृषी आयुक्तालयाने बियाणे उद्योगाला दिलासा देणारी पावले टाकली आहेत. संचारबंदी असली तरी अत्यावश्यक वस्तू कायदा १९५५ मधील तरतुदींचा आधार घेता बियाण्यांची पुरवठा व वाहतूक साखळी सुरळीत ठेवणे बंधनकारक असल्याचे आयुक्तालयाने स्पष्ट केले. 

बियाण्यांचा काढणी कालावधी फेब्रुवारी ते मे या दरम्यान असल्यामुळे लॉकडाऊन काळात बियाणे उद्योगातील कर्मचाऱ्यांना अडचणी येणार नाहीत याची दखल घेतली जात आहे. काढणीची कामे, काढणी पश्चात प्रक्रिया, बियाण्यांची वाहतूक व पॅकिंग ही सर्व कामे राज्यभर सद्या सुरू आहेत. 

बियाणे उद्योगात सध्या सोयाबीन, हायब्रीड मका, ज्वारी, भरड धान्ये, कापूस, कडधान्ये, भात, भुईमुग व भाजीपाला बियाणे उत्पादनाबाबत प्रक्षेत्रांपासून ते प्रोसेसिंग युनिटपर्यंत विविध कामे सुरू असल्याची माहिती जिल्हाधिकाऱ्यांना देण्यात आली आहे.

बियाणे उद्योगातील पुरवठा साखळी सुरळीत ठेवणारी सर्व कामे मार्च ते जून या कालावधीत होतील. प्रक्रिया केलेले बियाण्यांचे साठे स्टॉक पॉईंट तसेच गोदामांमध्ये हलवावे लागतील. त्यासाठी पॅकिंग मटेरियल्स्, रासायनिक बिजप्रक्रिया सामग्री पुरवठादार, वितरक, विक्रेते या घटकांची जबाबदारी मोठी आहे, अस आयुक्तालयाने नमुद केले आहे.  बियाणे कंपन्यांना काय दिल्या सूचना