विक्रेत्यांना बियाणे परवाना आता पाच वर्षांसाठी

पुणे:  देशातील सर्व बियाणे विक्रेत्यांना मिळणाऱ्या परवान्याची मुदत आता पाच वर्षांची करण्यात आली आहे. यामुळे दर तीन वर्षांनी परवाना देण्याची पध्दत बंद होईल, अशी माहिती सूत्रांनी दिली.  राष्ट्रीय बियाणे नियंत्रण आदेश १९८३ नुसार परवाना असल्याशिवाय बियाणे विक्री करता येत नाही. मात्र, परवान्याची मुदत केवळ तीन वर्षांची ठेवण्यात आली होती. यामुळे विक्रेत्यांची गैरसोय होत होती. ऑनलाइन कामकाजाअभावी दर तीन वर्षांनी कार्यालयांमध्ये हेलपाटे तसेच त्यातून आर्थिक देवघेव, यामुळे विक्रेते हैराण झाले होते.   केंद्रीय कृषी मंत्रालयाचे सह सचिव अश्विनीकुमार यांनी याबाबत आदेश जारी केले आहेत. “बियाणे नियंत्रण सुधारित आदेश २०१९ अनुसार आता परवाना कालावधी तीन ऐवजी पाच वर्षांचा राहील.” असे या आदेशात स्पष्ट करण्यात आले आहे. ऑल इंडिया ॲग्रो इनपुट डिलर्स असोसिएशनचे अध्यक्ष मनमोहन कलंत्री म्हणाले, की बियाणे आणि खत विक्रीची परवाना मुदत पाच वर्षांची करण्यासाठी गेल्या तीन वर्षांपासून पाठपुरावा सुरू होता. त्यापैकी बियाणे परवाना कालावधी दोन वर्षांनी वाढविण्याचा केंद्र सरकारचा निर्णय स्वागतार्ह आहे. यामुळे डिलर व कृषी विभागावर येणारा ताण कमी होईल. राज्याच्या कृषी विभागाकडे या निर्णयाची प्रत अद्याप पोचलेली नाही. अर्थात, मूळ परवान्यात काही अतिरिक्त बाबी जोडणे किंवा सुधारणा असल्यास विक्रेत्याला पाच वर्षांची वाट न बघता मधल्या काळात पुन्हा अर्ज करावा लागेल, असे सूत्रांचे म्हणणे आहे.