‘स्मार्ट’ योजनेअंतर्गत देवळा ॲग्रो प्रोड्यूसर कंपनीची निवड

नाशिक : जागतिक बँक अर्थसहाय्यित बाळासाहेब ठाकरे कृषी व्यवसाय व ग्रामीण परिवर्तन प्रकल्प (स्मार्ट) योजनेअंतर्गत जिल्ह्यातील देवळा ॲग्रो प्रोड्यूसर कंपनी लिमिटेडची निवड करण्यात आली आहे. या अंतर्गत १ कोटी ५३ लाख किमतीच्या ‘गो फॉर फ्रेश’ कंपनीसोबत ‘फळे व भाजीपाला उत्पादक भागीदारी’ या उपप्रकल्पास मान्यता देण्यात आली आहे. या कंपनीमार्फत देश व विदेशात कांदा निर्यात चालू करण्यात आल्याची माहिती अध्यक्ष आहेर यांनी दिली.

‘स्मार्ट’मार्फत निवड करण्यात आलेली देवळा ॲग्रो प्रोड्यूसर कंपनी ही नाशिक जिल्ह्यातील एकमेव शेतकरी कंपनी आहे. या कंपनीमार्फत शेतकऱ्यांच्या शेतातील माल थेट ग्राहकाच्या दारात नेण्यासाठी कोल्ड स्टोरेज, पॅक हाउस व त्या आनुषंगिक लागणाऱ्या सोयी-सुविधांसाठी दीड कोटी रुपयांचा निधीही मंजूर करण्यात आला असल्याची माहिती आहेर यांनी दिली.

‘स्मार्ट’च्या योजनेअंतर्गत देश-विदेशात भाजीपाला पुरवठा करणारी ‘गो फॉर फ्रेश’ या कंपनीबरोबर देवळा ॲग्रो प्रोड्यूसर कंपनीचा शासन स्तरावर करार झाला आहे. त्या अनुषंगाने सध्या शेतकऱ्यांच्या शेतातील कांदा परराज्याबरोबरच परदेशातही विक्री करण्यास सुरुवात झाली आहे. या निर्यातीतील पहिला कंटेनर आत्माचे प्रकल्प संचालक हेमंत काळे यांच्या उपस्थितीत रवाना करण्यात आला. या वेळी कंपनीचे संचालक प्रवीण मेधने, शुभम निकम, ‘गो फॉर फ्रेश’चे पदाधिकारी प्रवीण निकम, आत्माचे तालुका तंत्रज्ञान व्यवस्थापक सागर खैरनार, महेश देवरे, किशोर अहिरे आदी उपस्थित होते.