`पशुपालन, दुग्धव्यवसायातून होईल उत्पन्न दुपटीचे उद्दिष्ट साध्य` 

पुणे  ः केवळ शेतीवर अवलंबून राहून शेतकऱ्यांचे उत्पन्न दुप्पटीचे उद्दिष्ट साध्य होणार नाही. पशुपालन आणि दूध व्यवसायातून उत्पन्न दुप्पट करण्याचे उद्दिष्ट शेतकरी साध्य करू शकतो. यासाठी आधुनिक तंत्रज्ञानाचा वापर वाढविण्याची गरज असल्याचे मत मान्यवर तज्ज्ञांनी व्यक्त केले. 

पुणे जिल्हा सहकारी दूध उत्पादक संघाच्या वतीने कात्रज डेअरी येथे इंडियन सोसायटीज फॉर स्टडिज इन को-ऑपरेशन, वैकुंठ मेहता राष्ट्रीय सहकारी प्रबंध संस्थेच्या वतीने चर्चासत्राचे आयोजन करण्यात आले होते. या वेळी शेतकऱ्यांचे उत्पन्न दुप्पट करण्यात सहकारी दूध संघांचा सहभाग या विषयावरील चर्चासत्रात दूध संघांचे प्रतिनिधी आणि अधिकाऱ्यांनी मते मांडली. चर्चासत्राचे उद्‌घाटन ‘इंडियन सोसायटीज’चे चेअरमन जी. एच. अमीन आणि पुणे जिल्हा सहकारी दूध उत्पादक संघाचे अध्यक्ष विष्णू हिंगे यांच्या हस्ते झाले.

दूध उत्पादनासाठी उच्च दर्जाच्या पशुधन पैदाशीबरोबरच दुधाचा आहारात प्रतिमाणशी वापर वाढविण्यासाठी जनजागृती करणे आवश्‍यक आहे. यासाठी एकात्मिक धोरणा ठरविणेदेखील गरजेचे असल्याचे मत तज्ज्ञांनी व्यक्त केले. सहकार विभागाचे माजी निवडणूक सहआयुक्‍त संजीव खडके, माजी अतिरिक्‍त सचिव एस. बी. पाटील, दूध उत्पादक आणि प्रक्रिया व्यावसायिक कल्याणकारी महासंघाचे उपाध्यक्ष गोपाळराव म्हस्के, गोकुळ दूध संघाचे डेअरी अधिकारी डॉ. उदयकुमार मोगल, सागर किल्लेदार, सुरेखा खोत आदींनी यावेळी मार्गदर्शन केले. कार्यक्रमाचे संयोजन कार्यकारी संचालक डॉ. विवेक क्षीरसागर यांनी केले.