शेतकरीभिमुख संशोधनावर भर : कुलगुरू डॉ. विलास भाले

अकोला  ः डॉ. पंजाबराव देशमुख कृषी विद्यापीठ शेतकरीभिमुख संशोधनावर भर देत आहे. या भागातील खारपाण पट्ट्याच्या विकासासाठी विविध पीकपद्धतीवर भर देत असल्याचे प्रतिपादन कुलगुरू डॉ. विलास भाले यांनी केले.  येथे मृद विज्ञान व कृषी रसायनशास्त्र विभागाअंतर्गत वातावरण अनुरूप दिशादर्शक कृषी तंत्रज्ञान याविषयावर कृषी चर्चासत्राचे आयोजन येथे करण्यात आले. या वेळी उद्‌घाटन सत्राचे अध्यक्ष म्हणून डॉ. भाले बोलत होते. कार्यक्रमाला प्रमुख पाहुणे म्हणून उपस्थित असलेले कृषी संशोधन परिषदेचे उपमहासंचालक डॉ. एस. के. चौधरी यांनी मार्गदर्शनपर भाषणात जमिनीच्या मूलभूत गुणधर्मावर संशोधनाची गरज असल्याचे नमूद केले. एनबीएसएसचे संचालक डॉ. पी. चंद्रन यांनी मार्गदर्शन करताना मृद सर्वेक्षण व तपासणीद्वारे जमीन व्यवस्थापन करण्यावर भर दिला. माजी कुलगुरू डॉ. तपस भट्टाचार्य यांनी जमीन आरोग्य सुधारणेसाठी भूगर्भाचा अभ्यास होणे काळाची गरज असल्याचे नमूद केले.  वसंतराव नाईक मराठवाडा कृषी विद्यापीठाचे कुलगुरू डॉ. ए. एस. धवन यांनी एकात्मिक अन्नद्रव्य व्यवस्थापन, सेंद्रिय शेती व्यवस्थापन व चारही कृषी विद्यापीठाचे संशोधन सरळ व सोप्या भाषेमध्ये शेतकऱ्यांपर्यंत पोचविण्याची गरज असल्याचे सांगितले. यावेळी कृषी अधिष्ठाता डॉ. पी. जी. इंगोले यांची प्रमुख उपस्थिती होती. मृद विज्ञान व कृषी रसायनशास्त्र विभाग प्रमुख डॉ. पी. आर. कडू यांनी कार्यक्रमाचे प्रास्ताविक केले.