द्राक्ष बागायतदार संघाचे पुण्यात ३ ऑगस्टपासून अधिवेशन

नाशिक/पुणे : महाराष्ट्र राज्य द्राक्ष बागायतदार संघाचे ५९ वे वार्षिक अधिवेशन शनिवार (ता. ३) ते सोमवार (ता. ५) या दरम्यान शिवछत्रपती क्रीडा संकुल, महाळुंगे, बालेवाडी, पुणे येथे होणार आहे. शनिवारी सकाळी १२ वाजता भारतीय कृषी संशोधन परिषदेचे महासंचालक डॉ. त्रिलोचन महापात्रा यांच्या हस्ते उद्‌घाटन होईल. माजी केंद्रीय कृषिमंत्री शरद पवार या कार्यक्रमाच्या अध्यक्षस्थानी असतील.  या कार्यक्रमास राष्ट्रीय फलोत्पादन मंडळ (गुरुग्राम, हरियाना)चे व्यवस्थापकीय संचालक डॉ. अरिझ अहमद, भारतीय कृषी संशोधन परिषद (कृषी विस्तार) उपसंचालक डॉ. ए. के. सिंग, उपसंचालक (उद्यानविद्या) डॉ. आनंद कुमार सिंग, राज्याचे कृषी आयुक्त सुहास दिवसे हे प्रमुख पाहुणे असतील.  संघाच्या ५९ व्या वार्षिक अधिवेशनात ‘द्राक्ष व्यवस्थापन वार्षिक परिसंवाद’मध्ये ५ तांत्रिक सत्रे आयोजित करण्यात आली आहेत. यामध्ये द्राक्ष उत्पादन ते निर्यात क्षेत्रातील राष्ट्रीय व आंतरराष्ट्रीय स्तरावरील मान्यवर उपस्थित राहणार असून, मार्गदर्शन करणार आहेत. उद्‍घाटनाच्या दिवशी सकाळी १० ते १२ दरम्यान चर्चासत्र होईल, त्यानंतर उद्‍घाटन कार्यक्रम असेल. नंतर पुन्हा चर्चासत्रे सुरू होतील. पहिल्या तांत्रिक सत्रात ‘माती, पाणी, खत व्यवस्थापन’ दुसऱ्या तांत्रिक परिसंवादात ‘द्राक्ष बागांचे व्यवस्थापन’ तिसऱ्या तांत्रिक सत्रात ‘रोग व कीड व्यवस्थापन’ चौथ्या तांत्रिक सत्रात ‘द्राक्ष काढणी व निर्यात’ व पाचव्या तांत्रिक सत्रामध्ये ‘द्राक्षबाग व्यवस्थापन’ या विषयांतर्गत निर्यात आणि देशी बाजारपेठेसाठी द्राक्षाचा दर्जा या विषयावर तज्ज्ञ मार्गदर्शन करणार आहेत. तसेच पुणे येथील राष्ट्रीय द्राक्ष संशोधन केंद्राच्या संचालिका डॉ. इंदू सावंत व त्यांचे सहकारी शास्रज्ञ मार्गदर्शन करणार आहेत. सदर अधिवेशनात विविध तंत्रज्ञान व यांत्रिकीकरण यांची मांडणी करण्यात येणार असून, या महत्त्वपूर्ण चर्चासत्राचा सर्व द्राक्ष बागाईतदार यांनी लाभ घ्यावा, असे आवाहन महाराष्ट्र राज्य द्राक्ष बागायतदार संघाचे अध्यक्ष राजेंद्र पवार, उपाध्यक्ष शिवाजी पवार, खजिनदार कैलास भोसले, मध्यवर्ती विज्ञान समिती अध्यक्ष अरविंद कांचन यांनी केले आहे.  अांतरराष्ट्रीय पातळीवरील शास्त्रज्ञ करणार मार्गदर्शन