पुणे जिल्ह्यातील सात साखर कारखान्यांचा हंगाम आटोपला

पुणे ः पुणे जिल्ह्यातील साखर कारखान्यांचा ऊस गाळप हंगाम अंतिम टप्प्यात आला आहे. आतापर्यंत सात कारखान्यांचा गाळप हंगाम संपला असून तोडणी मजूर परतीच्या प्रवासाला निघाले आहेत. येत्या पंधरा दिवसांत अजून काही साखर कारखाने बंद होतील.

लोकसभा निवडणुकीची रणधुमाळी आणि वाढता उन्हाचा चटका यामुळे साखर कारखाने गळीत हंगाम लवकर संपवू लागले आहे. त्यातच वाढत असलेली पाणीटंचाईची तीव्रता व जनावरांसाठी आवश्यक असलेल्या चाऱ्याची स्थिती बघता मार्चअखेरपर्यंत बहुतांशी साखर कारखाने बंद होतील. या सर्व साखर कारखान्यांनी गेल्या पाच महिन्यांपूर्वी उसाच्या गाळप हंगामाला सुरवात केली होती. यंदा गळीत हंगामात सुमारे १७ साखर कारखाने सुरू झाले होते. 

सध्या पुणे जिल्ह्यातील अनेक भागात पाणीटंचाईची झळ वाढू लागली आहे. त्यामुळे उसासह, सर्वच पिकांना पाण्याचा फटका बसू लागला असून कारखान्यांनाही ऊस मिळेनासा झाला आहे. त्यामुळे साखर कारखानदार लवकर कारखाने बंद करू लागले आहेत. जिल्ह्यात एकूण सहकारी अकरा व खासगी सहा साखर कारखाने सुरू झाले होते. या साखर कारखान्यांची दैनंदिन गाळप क्षमता अडीच ते साडे सात हजार टन एवढी आहे. अजून पंधरा ते वीस दिवस साखर कारखाने चालतील अशी शक्यता आहे. 

जिल्ह्यात गेल्या पंधरा दिवसांपूर्वी म्हणजेच १२ फेब्रुवारीपासून साखर कारखाने बंद होण्यास सुरवात झाली आहे. यामध्ये भीमा पाटस या साखर कारखान्याने १२ फेब्रुवारी, तर व्यंकटेशकृपा या खासगी साखर कारखान्याने २१ फेब्रुवारीला गळीत हंगाम बंद केला आहे. त्यानंतर टप्प्याटप्प्याने साखर कारखाने गाळप हंगाम संपवू लागले आहे, असे पुणे प्रादेशिक सहसंचालक कार्यालयांच्या सूत्रांनी सांगितले.

गाळप हंगाम संपलेले साखर कारखाने  - भीमा पाटस सहकारी साखर कारखाना - इंदापूर सहकारी साखर कारखाना  - घोडगंगा सहकारी साखर कारखाना  - नीरा भिमा सहकारी साखर कारखाना  - श्रीनाथ म्हस्कोबा (खासगी)  - अनुराज शुगर्स (खासगी)  - व्यंकटेशकृपा शुगर (खासगी)