नवी दिल्ली : राष्ट्रीय सहकारी साखर महासंघाच्या वतीने कारखान्यांना देण्यात येणारे देश पातळीवरील पुरस्कार जाहीर झाले आहेत. कागल (जि. कोल्हापूर) येथील श्री छत्रपती शाहू सहकारी साखर कारखान्याने देशात सर्वोत्कृष्ट कारखान्याचा बहुमान पटकाविला आहे. २१ पुरस्कारांपैकी १० पुरस्कार पटकावून महाराष्ट्राने देशात प्रथम क्रमांक मिळवला आहे. राष्ट्रीय सहकारी साखर महासंघाचे व्यवस्थापकीय संचालक प्रकाश नाईकनवरे यांनी ही माहिती दिली. दिल्ली येथील एन. सी. यू. आय. सभागृहात २८ ऑगस्टला पारितोषिक वितरण सोहळा होणार आहे. माजी केंद्रीय मंत्री शरद पवार, केंद्रीय मंत्री नितीन गडकरी, रामविलास पासवान, रावसाहेब दानवे आदींची या सोहळ्यास प्रमुख उपस्थिती असेल. उत्तर प्रदेशने चार पुरस्कार मिळवून दुसरा क्रमांक मिळवला. हरियाणा, गुजरात व तमिळनाडू या राज्यातील सहकारी साखर कारखान्यांनी प्रत्येकी दोन पुरस्कार मिळवले असून मध्य प्रदेशने एक पुरस्कार पटकावून या वार्षिक पुरस्कार स्पर्धेत प्रथमच प्रवेश मिळवला आहे. विविध विभागांत यश मिळविलेल्या राज्यातील कारखान्यांमध्ये श्री दत्त (शिरोळ, कोल्हापूर), हुतात्मा किसन अहिर (वाळवा, सांगली), विघ्नहर जुन्नर, पुणे), श्री पांडुरंग (श्रीपूर, सोलापूर), विलास, लातूर, भाऊसाहेब थोरात कारखाना, (संगमनेर, नगर), जवाहर, (हुपरी, कागल), सदाशिवराव मंडलिक (हमीदवाडा, कोल्हापूर), आदींचा समावेश आहे. साखर उताऱ्यानुसार उच्च स्तर व निम्न स्तर या विभागात विविध प्रकारांमध्ये पुरस्कार जाहीर करण्यात आले आहेत. राष्ट्रीय सहकारी साखर महासंघ ही देशभरातील सर्व २६२ सहकारी साखर कारखाने व ९ राज्य सहकारी साखर संघाची शिखर संस्था आहे. महासंघातर्फे सन १९८५ पासून दरवर्षी देशातील सहकारी साखर कारखान्यांच्या ऊस विकास; तांत्रिक क्षमता व आर्थिक व्यवस्थापन या क्षेत्रातील कामगिरीचे विश्‍लेषण करण्यात येते व केंद्र शासनाच्या प्रमुख संचालक (साखर) यांच्या अध्यक्षतेखालील तज्ज्ञांच्या समितीद्वारे गुणांक देऊन विजेते निश्‍चित करण्यात येतात. यंदाच्या पुरस्कार योजनेत विक्रमी ९९ सहकारी साखर कारखान्यांनी सहभाग घेतला होता. त्यांची दोन गटात वर्गवारी करण्यात आली. सरासरी किमान १० टके साखर उतारा असणारे महाराष्ट्र, कर्नाटक व गुजरात यांचा एक गट व पंजाब, हरियाणा, उत्तर प्रदेश, मध्य प्रदेश, तमिळनाडू या १० टक्क्‍यांपेक्षा कमी साखर उतारा असणाऱ्या राज्यांचा दुसरा गट तयार करून प्रत्येक गटातील विषयवार सर्वाधिक गुण मिळवलेल्या कारखान्यांना पारितोषिकांसाठी पात्र ठरविण्यात आले. या व्यतिरिक्त सर्वाधिक ऊस गाळप, सर्वाधिक साखर उतारा व सर्वाधिक साखर निर्यातीसाठीदेखील विजेते निश्‍चित करण्यात आले.
| विभाग | उच्च साखर उतारा गट | निम्न साखर उतारा गट |
| ऊस विकास | श्री दत्त साखर कारखाना शिरोळ, कोल्हापूर (प्रथम) | गंगा किसान मिल, मोरणा, उत्तर प्रदेश (प्रथम) |
| पद्मभूषण क्रांतिवीर नागनाथआण्णा नायकवडी हुतात्मा किसन अहिर वाळवा (द्वितीय) | नवलसिंह मिल, बुऱ्हानपूर मध्य प्रदेश (द्वितीय) | |
| तांत्रिक कार्यक्षमता | श्री विघ्नहर साखर कारखाना जुन्नर पुणे (प्रथम) | किसान सहकारी मिल सथीऑन, उत्तर प्रदेश (प्रथम) |
| श्री पांडुरंग साखर कारखाना श्रीपूर सोलापूर (द्वितीय) | कॅथल को आपॅरेटीव्ह मिल, कैशल हरियाना (द्वितीय) | |
| आर्थिक व्यवस्थापन | विलास सहकारी साखर कारखाना, लातूर (प्रथम) | सुब्रमण्यम को-ऑपरेटिव्ह शुगर मिल, धर्मपुरी, तमिळनाडू (प्रथम) |
| सहकारमहर्षी भाऊसाहेब थोरात सहकारी साखर कारखाना संगमनेर, नगर (द्वितीय) | कल्लाकुरीची को-ऑपरेटिव्ह शुगर मिल, विल्लूपुरम, तमिळनाडू (द्वितीय) शुगर मिल, विल्लूपुरम, तमिळनाडू (द्वितीय) | |
| सर्वाधिक ऊस गाळप | जवाहर शेतकरी सहकारी साखर कारखाना, हुपरी, कोल्हापूर | शहाबाद को-ऑपरेटिव्ह शुगर मिल-हरियाना |
| सर्वाधिक साखर उतारा | सदाशिवराव मंडलिक कागल तालुका सहकारी साखर कारखाना, हमीदवाडा कोल्हापूर | किसान सहकारी चिनी मिल, पोवायन, उत्तर प्रदेश |
| सर्वाधिक साखर निर्यात | श्री नर्मदा खंड उधोग सहकारी मंडळी, गुजरात (प्रथम) | कर्मयोगी शंकरराव पाटील सहकारी साखर कारखाना, इंदापूर, पुणे (द्वितीय) |
| उत्कृष्ट सहकारी साखर कारखाना | सहकारी खांड उधोग मंडळी, गणदेवी, गुजरात | किसान सहकारी चिनी मिल, स्नेहरोड, नजिबाबाद, उत्तर प्रदेश |
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.