आम्ही विरोधात बसावे असाच जनतेचा कौल : शरद पवार

बारामती शहर, जि. पुणे  ः राज्यातील जनतेने आम्ही विरोधात बसावे असाच कौल दिलेला आहे, त्यामुळे वेगळ्या प्रस्तावावर चर्चा करण्यात अर्थ नाही. यापुढील काळात काँग्रेस आणि राष्ट्रवादी हातात हात घालून काम करेल, असे राष्ट्रवादी काॅंग्रेसचे अध्यक्ष  शरद पवार यांनी सांगितले.

काँग्रेस प्रदेशाध्यक्ष बाळासाहेब थोरात यांनी शनिवारी (ता. २६) बारामतीतील गोविंद बागेत श्री. पवार यांची भेट घेतल्यानंतर श्री. पवार व बाळासाहेब थोरात माध्यमांशी बोलत होते. बाळासाहेब थोरात यांनी ही दिवाळीच्या निमित्ताने सदिच्छा भेट आहे. आम्ही शिवसेनेला कुठलाही प्रस्ताव दिला नाही. शिवसेनेने आम्हाला प्रस्ताव दिला तर त्या संदर्भात आम्ही दिल्लीशी चर्चा करून याबाबतचा निर्णय घेऊ. मात्र, शिवसेनेकडूनदेखील आम्हाला कोणताही प्रस्ताव अद्याप आलेला नाही असे श्री. थोरात यांनी सांगितले. 

शरद पवार यांनीही या वेळी सत्ता स्थापन करणे किंवा तिसरा पर्याय निर्माण करणे याचा प्रश्नच निर्माण होत नाही असे सांगत जनतेने विरोधी पक्षात बसण्याचा कौल दिलेला आहे तो मी स्वीकारलेला आहे; मात्र भविष्यात जनतेच्या प्रश्नांवर काँग्रेस आणि राष्ट्रवादी हातात हात घालून काम करेल असा विश्वास व्यक्त केला.

दरम्यान, विरोधी पक्षनेतेपदाच्या संदर्भातदेखील काही चर्चा झालेली नाही. दिवाळीनंतर काँग्रेस व राष्ट्रवादी एकत्र बसून सर्वच विषयांवर निर्णय घेतील, असे बाळासाहेब थोरात यांनी स्पष्ट केले. दरम्यान, बुधवारी (ता. ३०) दुपारी मुंबईत राष्ट्रवादी काँग्रेस पक्षाच्या नवनिर्वाचित आमदारांची बैठक प्रदेशाध्यक्ष जयंत पाटील यांनी बोलावली असल्याचे श्री. पवार यांनी सांगितले. खासदार सुप्रिया सुळे व नवनिर्वाचित आमदार रोहित पवार या वेळी उपस्थित होते.