शिवसेना, काँग्रेस, राष्ट्रवादीचेच सरकार येणार : शरद पवार

नागपूर  ः राज्यात शिवसेना, काँग्रेस, राष्ट्रवादी काँग्रेसचे सरकारच स्थापन होणार असून हे सरकार पाच वर्षांचा कार्यकाळ देखील पूर्ण करेल, असा विश्‍वास राष्ट्रवादी कॉंग्रेसचे अध्यक्ष शरद पवार यांनी व्यक्‍त केला. 

येथील प्रेस क्‍लबमध्ये शुक्रवारी (ता.१५) आयोजित पत्रकार परिषदेत ते बोलत होते. श्री. पवार म्हणाले, की राज्यात कोणत्याही प्रकारची राजकीय अस्थिरता नाही. राज्यात शिवसेना, काँग्रेस, राष्ट्रवादी काँग्रेसचे सरकार येणार आहे. या सरकारचा कारभार पाच वर्षे सुरळीत चालेल. या काळात राज्याच्या सर्वांगीण विकासावर लक्ष्य केंद्रित केले जाणार आहे. 

राष्ट्रवादीचे आमदार फोडण्याचा दावा भाजपकडून केला जात आहे. या संदर्भाने विचारलेल्या प्रश्‍नावर ‘‘मला या संदर्भाने माहिती नाही, तुम्हाला काही माहिती असेल तर सांगा’’, असे श्री. पवार म्हणाले. देवेंद्र फडणवीस यांना मी चांगला ओळखतो. त्यांनी ‘मी पुन्हा येणार’ असे तीन वेळा म्हटले होते. मात्र ते ज्योतिषी असल्याची माहिती मात्र मला नव्हती, असे श्री. पवार म्हणाले.

राज्यासह विदर्भात कापूस, सोयाबीन, तूर तसेच संत्र्याची मॉन्सूनोत्तर पावसामुळे मोठी हानी झाली. कापसाची बोंड भिजली, स्टेपल लेंथदेखील कमी मिळणार आहे. कापसाचा दर्जा खालावल्याने त्याला योग्य दर मिळणार नाही. संत्र्याची गळ झाली, संत्रा पिकात बुरशीजन्य रोगांचा प्रादुर्भाव वाढला. त्यामुळे संत्रा उत्पादकांच्या अडचणीतदेखील भर पडली आहे. शेतीसंदर्भातील प्रश्‍न सोडवण्यासाठी येत्या आठवड्यात केंद्रीय कृषी मंत्रालयस्तरावर चर्चा केली जाईल. शेतकऱ्यांशी निगडित आर्थिक प्रश्‍नांसदर्भाने अर्थ मंत्रालयाशी देखील संवाद साधला जाईल. सोमवारपासून संसदेचे अधिवेशन सुरू होणार आहे. त्यानंतरच्या काळात काही निवडक शेतकरी प्रतिनिधींना सोबत घेऊन ही चर्चा होईल, असे श्री. पवार यांनी सांगितले.