शिवसेना निवडणुकीला महत्त्व देणारा पक्ष नाही ः आदित्य ठाकरे

नगर : ‘‘जनआशीर्वाद यात्रेत जनतेचे आशीर्वाद व प्रेम मिळते आहे. पाऊस सुरू असतानाही तुम्ही थांबला, हे वलय, हे आशीर्वाद केवळ शिवसैनिकांच्या कामामुळे आहे. मला काहीही नको, जनतेशी संवाद साधण्याचा हा छोटासा प्रयत्न आहे. निवडणुकीसाठी किंवा मुख्यमंत्रिपदासाठी ही यात्रा नाही. शिवसेना हा एकमेव पक्ष आहे, की जो निवडणुकांना महत्त्व देत नाही. पुढचे सरकार शिवशाहीचे असेल,’’ असे प्रतिपादन युवा सेनाप्रमुख आदित्य ठाकरे यांनी आज केले.

जनआशीर्वाद संवाद यात्रेनिमित्त ढोकी येथे आयोजित कार्यक्रमात ते बोलत होते. ठाकरे म्हणाले, ‘‘शिवसेना हा एकमेव पक्ष आहे, की जो निवडणुकांना महत्त्व देत नाही. सत्ता असो वा नसो; जनतेची कामे करीत राहणार. शिवसेना-भाजप युती झाली, तेव्हा पहिली अट शेतकऱ्यांची सरसकट कर्जमाफी व्हावी, अशी होती. शेतकऱ्यांच्या पीकविम्यासाठी शहरातील शिवसैनिक रस्त्यावर उतरले. आता विमा कंपन्या खडबडून जाग्या झाल्या. आता निधी वर्ग होत आहे.’’

भाजपमध्ये काही चांगली मंडळीही : औटी आदित्य ठाकरे यांच्या या कार्यक्रमावर भाजपचा बहिष्कार असल्याची घोषणा पारनेर तालुकाध्यक्ष विश्‍वनाथ कोरडे यांनी केली होती. त्या पार्श्‍वभूमीवर पक्षाचा एकही पदाधिकारी ठाकरे यांच्या कार्यक्रमाकडे फिरकणार नाही, असे वातावरण तयार करण्यात आले होते. तथापि, पारनेर तालुका भाजप महिला आघाडीच्या प्रमुख अश्विनी थोरात यांनी समर्थकांसह कार्यक्रमास हजेरी लावली. औटी यांनीही त्यांचे स्वागत करीत, ‘‘सर्व भाजप सारखी नाही, काही चांगली मंडळीही त्या पक्षात आहेत. कसला बहिष्कार अन्‌ कसलं काय,’’ असे म्हणत थोरात यांचा, ‘‘ताई, तुम्ही या, बसा!’’ अशा शब्दांत आदरपूर्वक सन्मान केला. भाजपच्या बहिष्काराची पार्श्‍वभूमी माहीत झाल्याने खुद्द आदित्य ठाकरे यांनीही थोरात यांना अदबीने नमस्कार केला.