agriculture news in Marathi, shocking defeat of raju shetty, Maharashtra | Agrowon

राजू शेट्टींच्या पराभवाने शेतकरी चळवळीला धक्का
टीम अॅग्रोवन
शुक्रवार, 24 मे 2019

माझा पराभव झाला असला, तरी मी काम करतच राहणार आहे. गोरगरीब, दीनदलित, कष्टकरी यांच्यासाठी मी झटणार आहे. एका पराभवाने मला फारसा फरक पडणार नाही, मी लढतच राहीन.
- राजू शेट्टी

कोल्हापूर ः शेतीविषयक विविध प्रश्‍नांबाबत देश पातळीवर आंदोलने करणाऱ्या खासदार राजू शेट्टी यांचा धक्कादायक पराभव शेतकरी चळवळीतील कार्यकर्त्यांना जिव्हारी लागला आहे. खासदारकीच्या कालावधीत गेल्या दहा वर्षांत विशेष करून ऊस उत्पादक शेतकऱ्यांना आधार ठरणाऱ्या शेट्टींच्या पराभवाने ऊस पट्टा हादरून गेला आहे. त्यांच्या पराभवाने स्वाभिमानी शेतकरी संघटनेच्या चळवळीलाच दणका बसला आहे. श्री. शेट्टींचा पराभव कार्यकर्त्यांच्या जिव्हारी लागणारा ठरला आहे. हातकणंगले लोकसभा मतदारसंघातील या उलथापालथीने आता दक्षिण महाराष्ट्रातील राजकारणच बदलून जाणार आहे. 

गेल्या दहा वर्षांपासून खासदार शेट्टी यांनी शेतकरी प्रश्‍नावर विविध ठिकाणी आंदोलने करून देशभर शेतकरी संघटनांचे जाळे निर्माण केले. उसासहित कर्जमाफी व अन्य शेतकरी प्रश्‍नाबाबत सातत्याने लढणारा खासदार म्हणून देशभरातील शेतकरी संघटनांमध्ये एक दबदबा निर्माण केला. संघटनांची एकजूट बांधली; पण या निवडणुकीत मतदारांमध्ये याची छाप सोडण्यात मात्र ते अपयशी ठरले. लोकसभेच्या निवडणुकीत त्यांच्या विरोधात लढणार कोण असाच प्रश्‍न होता. त्यांचा विजय ही औपचारिकता होती. परंतु निवडणुका लागल्यानंतर मात्र चित्र पालटले. भाजपचा पाठिंबा काढून घेतल्यानंतर त्यांनी कॉँग्रेस राष्ट्रवादीची सलगी वाढविली. इथेच नाराजीला सुरवात झाली. निवडणुका जाहीर झाल्यानंतर पंतप्रधान नरेंद्र मोदी यांना लक्ष्य करीत त्यानी भाजपवर टीकास्त्र सोडले. कॉँग्रेस राष्ट्रवादीलाही उमेदवार मिळत नसल्याने त्यांनी शेट्टींच्या बरोबर आघाडी करीत त्यांना हातकणंगलेची उमेदवारी दिली. 

दोन्ही कॉँग्रेसवर टीका करून पदे मिळविलेल्या शेट्टींनी याच कॉँग्रेसच्या वळचणीला जावे ही बाब मतदारांना पचनी पडली नाही. त्यांनी स्वतंत्र लढावे, अशी मागणी कार्यकर्त्यांनी केली; पण त्यांनी आघाडीतून लढण्याचा अंतिम निर्णय घेतला. ही बाब नापसंतीला कारणीभूत ठरली. याच बरोबर जातीयवाद हा फॅक्‍टर ही त्यांच्या पराभवातील एक महत्त्वाचा बाब ठरली. ते स्वत:च्याच जातीतील कार्यकर्त्यांना बळ देतात या भावनेतून बहुजन समाज त्यांच्या विरोधात गेला. त्यांच्यासोबत एकेकाळी काम करणारे मंत्री सदाभाऊ खोत, आमदार उल्हास पाटील या नेत्यांनी बहुजनांची मोट बांधून नवखे उमेदवार धैर्यशील माने यांना बळ दिले. जागा शिवसेनेची असली तरी, भाजपनेही ही जागा प्रतिष्ठेची केली. 

महसूलमंत्री चंद्रकांत पाटील यांनी कोणत्याही परिस्थितीत शेट्टी निवडून येऊ नयेत यासाठी शिवसेनेला रसद पुरविली. तरुण मतदाराही स्वाभिभानीच्या विरोधात गेल्याचे चित्र या निकालाच्या निमित्ताने दिसले. निकालाच्या संपूर्ण फेऱ्यात शेट्टी कधीच आघाडी मिळवू शकले नाहीत याचे दु:ख स्वाभिमानीच्या कार्यकर्त्याला नक्कीच बोचले असेल. स्वाभिमानीचे दैवत समजल्या जाणाऱ्या शेट्टींचा पराभव हा स्वाभिमानीच्या कार्यकर्त्यांचे खच्चीकरण करणारा ठरला आहे. भविष्यात संघटना शेतकरी प्रश्‍नांबाबत किती जोराने लढते, या पराभवाचा त्यांच्या उमेदीवर परिणाम होईल का, याचे उत्तर येणारा काळच देऊ शकणार आहे. सध्या मात्र हा धक्का अनेक दिवस ऊस पट्ट्यात चांगलाच जाणवणार आहे.

सांगलीतही पराभव
हातकणंगले नजीकच्या सांगली लोकसभा मतदारसंघातही शेवटपर्यत उमेदवारीचा घोळ राहिला. कॉंग्रेसची जागा असलेल्या या मतदारसंघात कॉंग्रेसला उमेदवार मिळत नसल्याने ही जागा स्वाभिमानीला देऊ केली. अनेक प्रयत्न करुन माजी मुख्यमंत्री कै. वसंतदादा पाटील यांचे नातू विशाल पाटील यांना स्वभिमानीकडून उमेदवारी दिली. ऐनवेळी स्वाभिमानीत दाखल झालेल्या विशाल पाटील यांना प्रचाराचे सूत्र अखेरपर्यंत सापडले नाही. विद्यमान खासदार संजय पाटील यांच्याबाबत नाराजी असूनही त्याचा फायदा विशाल पाटील यांना घेता आला नाही. कॉंग्रेस आघाडीनेही प्रचारास एकसंधपणा दाखविला नाही. परिणामी प्रचाराचा भार ‘स्वाभिमानी’वर आला. बहुजन आघाडीचे उमेदवार गोपीचंद पडळकर यांनीही निवडणूक लढवून विशाल पाटील यांच्या विजयाच्या शक्‍यतेवर पाणी फेरले. अखेर विद्यमान खासदार संजय पाटील यांनीच बाजी मारुन स्वाभिमानीच्या आशा संपुष्टात आणल्या. यामुळे सांगली जिल्ह्यातील स्वाभिमानींचे अस्तित्व टिकवण्याचे आव्हान उभे ठाकले आहे.

इतर बातम्या
बीड, उस्मानाबादमध्ये चारा छावण्यांत ३९...उस्मानाबाद, बीड : पावसाची अवकृपा कायम...
खानदेशात शेतीकामात मजूरटंचाईजळगाव : खानदेशात जुलैमधील अखेरचे १० दिवस व...
पोल्ट्रीधारकांना सवलतीच्या दरात धान्यविटा, जि. सांगली : पोल्ट्रीधारकांना...
वनस्पतीतील कडवटपणांमागील रहस्यांचा...कडूनिंबासह अन्य अनेक वनस्पतीमधील कडवट, तीव्र...
नाशिक जिल्ह्यात पावसामुळे पूर्वहंगामी...नाशिक : संततधार सुरू असलेल्या पावसामुळे...
नांदेड जिल्ह्यात पीककर्जाचे ७३ हजारांवर...नांदेड : चालू आर्थिक वर्षाच्या (२०१९-२०) पहिल्या...
कर्जमाफीबाबत धोरण सुस्पष्ट नाही : एकनाथ...जळगाव  : शासनाने शेतकऱ्यांना कर्जमाफी दिली....
पुणे विभागात खरिपाची नऊ लाख ८० हजार...पुणे  ः पावसाअभावी खरीप पेरण्या उशिराने...
कुठे गेला कृत्रिम पाऊस ; सरकारने...बदनापूर / भोकरदन, जि. जालना ः अर्धे राज्य...
रासप ५७ जागांची मागणी करणार : महादेव...हिंगोली  : आगामी विधानसभा निवडणुकीत...
मुंबई बाजार समितीच्या निवडणुकीची ‘...पुणे  ः चटई निर्देशाकांसह कोट्यवधी...
अकोला जिल्ह्यात ‘आत्मा’चा कारभार...अकोला  ः राज्याच्या कृषी विभागात कधीकाळी...
कऱ्हाडमधील ९९ शाळांना बसला महापुराचा...कऱ्हाड, जि. सातारा  : महापुरामुळे...
गडचिरोली जिल्ह्यात अतिवृष्टीमुळे १७९७...गडचिरोली  ः या वर्षी अतिवृष्टीमुळे...
शेततळ्याच्या प्लॅस्टिकला तूर्त अनुदान...पुणे  : शेततळ्याच्या अस्तरीकरणाकरिता...
वारणा-कृष्णा नदीकाठच्या शेतजमिनी कोसळू...सांगली ः सांगली जिल्ह्यातील कृष्णा आणि वारणा...
जालना जिल्ह्यात वीस हजार शेतकऱ्यांच्या...जालना : जिल्ह्यातील १२० गावांत हवामान अनुकूल...
दर्जाहीन शिक्षण संस्थांवर कारवाई होणार...पुणे: राज्यात दर्जाहीन कृषी महाविद्यालये...
अवर्षणप्रवण, आत्महत्याग्रस्त जिल्ह्यांत...अकोला ः राज्यातील अवर्षणप्रवण क्षेत्र,...
महिनाअखेरीस पावसाला पोषक हवामानपुणे : ऑगस्ट महिन्याच्या सुरवातीला राज्यात दमदार...