धुळे, जळगाव जिल्ह्यात गटशेती योजनेला अल्प प्रतिसाद

जळगाव : गटशेतीला प्रोत्साहन देण्यासंबंधीच्या   गटशेती योजनेला खानदेशातील धुळे व जळगावात यंदा प्रतिसादच मिळालेला नाही. मागील वर्षी गट नोंदणीचा लक्ष्यांक दोन्ही जिल्ह्यांमध्ये पूर्ण झाला. यंदा मात्र नोंदणीच केलेली नसल्याचे चित्र आहे.

२०१७-१८ मध्ये धुळे जिल्ह्यात पाच गटांची गटनोंदणी झाली. जळगावात सहा गटांची नोंदणी पूर्ण झाली. यंदाही धुळ्यात पाच व जळगाव जिल्ह्यात सहा गटांची नोंदणी करण्याचा लक्ष्यांक आहे. परंतु तो अजूनही पूर्ण झालेला नाही. शेतकऱ्यांचा फारसा प्रतिसाद नाही. या योजनेतील काही अटी जाचक आहेत. त्यातच यंदा दुग्ध उत्पादनासंबंधीचा प्रकल्प, आराखडा या योजनेत घेता येणार नाही. कारण दूध धंदा अडचणीत आहे. त्याबाबतचा शासनादेशच जारी झाला आहे. म्हणून दूध उत्पादनाबाबत ज्या शेतकऱ्यांचे प्रस्ताव होते, ते माघारी गेले आहेत.

मागील वर्षी धुळ्यात पाच गटांची नोंदणी झाली, परंतु कार्यवाही कोणतीच नाही. यंदा नव्या गटांच्या नोंदणीसह योजनेच्या अंमलबजावणीसंबंधी येत्या १५ तारखेला धुळे जिल्हाधिकारी यांनी बैठक बोलावली आहे.  या योजनेत सहभागासाठी २० शेतकरी आवश्‍यक आहेत. त्यांच्याकडे १०० एकर क्षेत्र असावे. सर्व २० शेतकरी एकाच गावातील हवेत. त्यांची शेती त्यांच्या गावात किंवा गावानजीकच्या इतर ठिकाणी असावी, असा निकष आहे. नेमके एकाच गावात २० शेतकरी गोळा करणे व १०० एकर शेतीचे उद्दीष्ट साध्य करताना अडचणी येत आहेत. योजनेतून एक कोटीपर्यंतचे अनुदान मिळते. ते चार टप्प्यात दिले जाते. सुरवातीला २० टक्के, नंतर दोन टप्प्यांत प्रत्येकी ३० टक्के व शेवटी सर्व बाबींची मूल्यमापन, पडताळणी, कार्यवाही पाहून २० टक्के अनुदान दिले जाते.

उपसा सिंचन योजनेला मंजुरी

या योजनेसंबंधी उपसा सिंचन योजना घेण्यास मंजुरी देण्यात आली आहे. ४२ लाखांपर्यंतचा खर्च त्यातून करता येईल. तलाव, धरण क्षेत्र, नदीवरून जलवाहिनी आणता येणार आहे. या योजनेसाठी आवश्‍यक वीजपुरवठ्याची यंत्रणाही उभारता येणार आहे.