अकोला बाजार समितीत व्यापाऱ्यांचा बंद

अकोला : अाजवर व्यवहार सुरू असलेल्या अकोला कृषी उत्पन्न बाजार समितीतही व्यापारी-अडत्यांनी हमीभावापेक्षा कमी दरात खरेदी करणाऱ्याविरुद्ध कैद व दंडाची शिक्षा करणाऱ्या सुधारणेस विरोध करीत शनिवारपासून (ता. १) व्यवहार बंद केले अाहेत. अाता वऱ्हाडातील तीनही जिल्ह्यांतील बहुतांश बाजार समित्या बंदमध्ये सहभागी झाल्या अाहेत.

सरकारच्या निर्णयाविरुद्ध ठिकठिकाणी व्यापाऱ्यांनी खरेदी-विक्री करण्यास नकार देत बाजार समित्या बंद केल्या. या भागात काही बाजार समित्या २३ अाॅगस्टपासून बंद अाहेत. अाता टप्प्याटप्प्याने सर्वच बाजार समित्यांमधील व्यवहार यामुळे ठप्प झाले अाहेत. अाजवर अकोला कृषी उत्पन्न बाजार समितीत व्यवहार सुरू होते. परंतु अाता याही ठिकाणी व्यापाऱ्यांनी नकार देत जोपर्यंत लेखी सूचना मिळत नाही, तोपर्यंत व्यवहार न करण्याचे सांगितले.वऱ्हाडात अकोला, बुलडाणा, वाशीम जिल्ह्यात अातापर्यंत १७ पेक्षा अधिक बाजार समित्यांमध्ये बंद सुरू अाहे. यात अाता अकोल्याचाही सहभाग झाला. या भागात मूगाचा हंगाम सुरू झाला अाहे. येत्या अाठवड्यापासून हा शेतीमाल मोठ्या प्रमाणात बाजारात विक्रीला येण्याची शक्यता असताना बाजार समित्यांमध्ये खरेदी-विक्री ठप्प झालेली अाहे. याचा थेट परिणाम बाजारभावांवर होण्याची चिन्हे अाहेत.

बंद बाजार समित्या (जिल्हानिहाय)

अकोला : अकोला, अकोट, तेल्हारा

बुलडाणा : बुलाडणा, मलकापूर, जळगावजामोद, संग्रामपूर, चिखली, मेहकर, सिंदखेडराजा, खामगाव   वाशीम : वाशीम, मालेगाव, मंगरुळपीर, मानोरा, कारंजा.