अतिवृष्टी, पूरग्रस्त शेतकऱ्यांना ‘सियाम’चा मदतीचा हात

औरंगाबाद : अतिवृष्टी व पुरामुळे नुकसान झालेल्या राज्यातील शेतकऱ्यांना रब्‍बी हंगामासाठी लागणारे जवळपास २ कोटी ३८ रुपये किमतीचे बियाणे पुरविण्याचा निर्णय सीड इंडस्ट्रीज असोसिएशन ऑफ महाराष्ट्र(सियाम)ने घेतला आहे. त्यासंबंधीचे पत्र सियामच्या वतीने सोमवारी कृषिमंत्री डॉ. अनिल बोंडे यांना देण्यात आले.  ‘सियाम' ही महाराष्ट्रात कार्यरत असणाऱ्या मुख्य बियाणे कंपन्यांची अधिकृत नोंदणीकृत संघटना आहे. अतिवृष्टी व पुरामुळे राज्यातील काही भागात शेती व शेतकऱ्यांचे आतोनात नुकसान झाले आहे. सामाजिक दायित्वाचे भान ठेवताना कर्तव्य म्हणून सियामच्या जवळपास १५ सभासद कंपन्यांनी रब्बी हंगामात लागणाऱ्या पिकाचे बियाणे स्वरूपात मदत करण्याचा निर्णय घेतला आहे.   यामध्ये अजित सीड्‌स प्रा. लि, अंकुर सीड्‌स प्रा. लि., वसंत ॲग्रोटेक इंडिया लि., एलोरा नचरल सीड्‌स प्रा. लि., ग्रीन गोल्ड सीड्‌स प्रा. लि., कलश सीड्‌स प्रा. लि., नोन यू. सीड्‌स (इ) प्रा. लि., महिको, नामदेव उमाजी ॲग्रोटेक प्रा. लि., नाथ बायोजिन्स इंडिया लि., रासी सिड्‌स प्रा. लि., सफल सीड्‌स अँड बायोटेक प्रा. लि., तुलसी सीड्‌स प्रा. लि., नोव्हागोल्ड सीड्‌स प्रा. लि., निर्मल सीड्‌स प्रा. लि. आदी कंपन्या सहभागी आहेत.  जवळपास २ कोटी ३८ लाख रुपयांचे बियाणे पुरविण्याची तयारी या कंपन्यांनी दर्शविली आहे. यामध्ये गहू, मक्‍का, हरभरा, वाटाणा, रब्बी ज्वारी, चारा पिके तसेच भाजीपाला पिकांच्या बियाण्यांचा समावेश आहे. यासंबंधीचे पत्र सियामच्या प्रतिनिधींनी राज्याचे कृषिमंत्री डॉ. अनिल बोंडे यांना सोमवारी (ता. ९) सियामचे अध्यक्ष अजित मुळे, वैभव काशिकर, संतोष थावरे, सियामचे कार्यकारी संचालक डॉ. शालिग्राम वानखेडे यांनी सुपूर्त केले. या वेळी कृषी विभागाचे निविष्ठा व गुणनियंत्रण संचालक विजय घावटे यांची प्रामुख्याने उपस्थिती होती. कृषी आयुक्‍तालयाच्या मार्गदर्शनाखाली बियाणे पुरविण्याची कार्यवाही केली जाणार असल्याचे सियामचे कार्यकारी संचालक डॉ. वानखेडे यांनी कळविले आहे.