खानदेशात कांदा लागवडी वाढण्याचे संकेत

जळगाव ः रब्बी हंगामातील कांद्याची खानदेशात यंदा किमान एक ते दीड हजार हेक्‍टरने लागवड वाढू शकते, असा अंदाज आहे. कांदा लागवडीसाठी शेतकरी रोपवाटिकांमध्ये रोपे तयार करण्याची कार्यवाही करीत आहेत. 

कांदा लागवडीसाठी धुळ्यातील धुळे, साक्री, शिरपूर, शिंदखेडा, जळगावमधील चोपडा, यावल, रावेर, पाचोरा, जळगाव, नंदुरबारमधील शहादा, नंदुरबार हा भाग आघाडीवर असतो. मागील हंगामात पाणीटंचाईमुळे धुळ्यातील शिंदखेडा, धुळे, साक्री, नंदुरबार, जळगावमधील जळगाव, पाचोरा, जामनेर भागात हवी तेवढी कांदा लागवड रब्बी हंगामादरम्यान झाली नव्हती. यंदा सर्वत्र पाऊसमान चांगले राहिले. 

जळगाव जिल्ह्यात १४० टक्के तर धुळे नंदुरबारात पाऊसमान अनुक्रमे १८० व २०० टक्के, असे आहे. नदी, नाल्यांमध्ये पाणी खळखळून वाहत आहे. विहिरींची जलपातळी टिकून राहील. पाणीटंचाई फारशी भासणार नाही, अशी स्थिती तूर्ततरी आहे. कांद्याला सिंचनासाठी पाण्याची शाश्‍वती हवी असते. ही शाश्‍वती यंदा दिसत आहे. 

दुसरीकडे कांद्याचे दर प्रतिक्विंटल किमान तीन हजार रुपयांपर्यंत सध्या आहेत. दर टिकून राहतील, अशी अपेक्षा शेतकऱ्यांना आहे. यामुळे कांदा लागवडीचे नियोजन अनेक शेतकरी करीत आहेत. ज्यांच्याकडे सिंचनासाठी पाणी आहे, अशा शेतकऱ्यांनी सोयाबीन, कडधान्य, ज्वारी, कापूस आदी पिकांखालील क्षेत्रात कांदा लागवडीचे नियोजन केले आहे. रोपवाटिका तयार केल्या जात आहेत. 

काही शेतकरी रोपांच्या विक्रीसाठी रोपवाटिका तयार करीत आहेत. रोपांना प्रतिवाफे दीड ते दोन हजार रुपये दर मिळू शकतो. एका वाफ्यातील रोपांमध्ये एक ते दीड एकरात लागवड करणे शक्‍य होईल.