तुती लागवडीचे नियोजन नोव्हेंबरपर्यंत स्पष्ट

औरंगाबाद : मराठवाड्यात पुढील वर्षाच्या तुती लागवडीच्या नियोजनाची प्रक्रिया रेशीम विभागाने सुरू केली आहे. त्यासाठी १५ ऑगस्टच्या ग्रामसभेत ठराव घेण्याचे स्पष्ट सूचित केलेले होते. येत्या नोव्हेंबरमध्ये तुती लागवडी विषयीचे चित्र स्पष्ट होणार आहे.

यंदा मराठवाड्याला तुती लागवडीचे ३७०० एकरांचे उद्दिष्ट मिळाले होते. त्याच्या पूर्वतयारीसाठी राबविल्या गेलेल्या महारेशीम अभियानाला उत्स्फूर्त प्रतिसाद मिळाला. मराठवाड्यात जवळपास १० हजार ८८५ एकरांची नोंदणी झाली. त्यादृष्टीने नियोजन करताना रेशीम विभागाने तुतीच्या ४ कोटी ८६ लाख ८२ हजार रोपांची निर्मिती केली. त्यानंतर पावसाच्या खंडाने तुती लागवडीच्या कामात खोडा घातला होता.

संपूर्ण मराठवाड्यातील आठही जिल्ह्यांतील ७६८ गावातील प्रति शेतकरी एक एकर प्रमाणे १० हजार ८८५ एकर क्षेत्र तुती लागवडीसाठी नोंदल्या गेले. जानेवारी- फेब्रुवारीमध्ये रोपनिर्मिती व जून, जुलैमध्ये त्याच रोपांनी लागवडीचे सूत्र महारेशीम अभियानाच्या यशस्वीतेसाठी हाती घेतले होते. उद्दिष्टाच्या पूर्तीसाठी २ कोटी ३ लाख ५० हजार रोपांची आवश्‍यकता असताना तुतीची ४ कोटी ८६ लाख ८२ हजार रोपे शेतकऱ्यांनी तयार केली.

रेशीम विभागाने केलेल्या नियोजनबद्ध कार्यामुळे हे शक्‍य झाले आहे. गतवर्षी केलेल्या नियोजनाचा कित्ता गिरवितांनाच यंदाही रेशीम विभागाने पुढील वर्षी किमान ३० हजार शेतकरी तुती लागवडीसाठी प्रेरित होतील असे नियोजन केले असल्याची माहिती रेशीमचे सहायक संचालक दिलीप हाके यांनी दिली. त्यासाठी जिल्ह्यातील प्रत्येक ग्रामपंचायतींना जिल्हाधिकारी व पंचायत विभागाच्या माध्यमातून ग्रामसभेतून ठराव घेण्याविषयीचे सूचित करण्यात आले होते.

येत्या नोव्हेंबरमध्ये ठराव घेणाऱ्या ग्रामपंचायतमध्ये मोहीम राबविण्याची प्रक्रिया सुरू करण्यात येणार आहे. मनरेगांतर्गत लेबर बजेटची प्रक्रिया नोव्हेंबमध्ये सुरू करण्यात येईल. त्यामुळे त्या वेळी नेमक्‍या किती ग्रामपंचायतींनी ग्रामसभेतून रेशीम उद्योगामध्ये सहभागी होण्यासाठी ठराव घेतला हे स्पष्ट होईल. जानेवारी, फेब्रुवारीमध्ये तुती लागवडीसाठीच्या नर्सरीची, रोपनिर्मितीची प्रक्रिया करण्यात येणार आहे.

गतवर्षी प्रमाणेच पुढील वर्षीही नियोजनातून रेशीम उद्योगाला शेतकऱ्यांमध्ये रूजविण्याचा प्रयत्न राहील. त्यासाठी प्रशासनाचीही साथ मिळते आहे. शिवाय शेतकरी रेशीमला मोठ्या प्रमाणात पसंती देत आहेत. - दिलीप हाके, सहायक संचालक रेशीम, औरंगाबाद विभाग