सिंधुदुर्गात शेकडो एकर भातशेती कुजली

सिंधुदुर्ग : विजयदुर्ग, खारेपाटण आणि राजपूर खाडी परिसरातील २० हून अधिक गावांतील  शेकडो एकर भातशेती सलग सात ते आठ दिवस पुराच्या पाण्याखाली राहिली. त्यामुळे ती कुजली आहे. या नुकसानीचे अजूनही पंचनामे करण्यात आलेले नाहीत. त्यामुळे शेतकऱ्यांमध्ये संताप आहे. 

तीन ते सात ऑगस्ट या कालावधीत सिंधुदुर्गात मुसळधार पाऊस झाला. नदीनाल्यांना आलेला पूर आणि समुद्राला आलेले उधाण, यामुळे खाडीकिनाऱ्यांलगतच्या गावांना पुराचा मोठा तडाखा बसला. सिंधुदुर्ग जिल्ह्यातील कणकवली आणि देवगड तालुक्यातील काही गावे खाडीकिनाऱ्याला आहेत. यामध्ये खारेपाटण, विजयदुर्ग, वाघोटन, मुटाट, गिर्ये, मणचे, मालपे, पोंभुर्ले, धालवली, कोर्ले, कुणकवण, सोनाली, शेर्पे; तर राजापूर तालुक्यातील तारळ, नाणार, कुंभवडे, पालये, प्रिंदावण, बांदीवडे, वाल्ये, शेजवली या गावांचा समावेश आहे. या गावांतील शेकडो शेतकऱ्यांच्या भातशेतीचे पुरामुळे नुकसान झाले. 

दरम्यान, या भागात कमी हळवी पिके घेतली जातात. १०० दिवसांची पिके घेत असल्यामुळे सध्या ती फुलोरा येण्याच्या स्थितीत होती. पूर येण्यापूर्वी हिरवागार दिसणारा हा भातशेतीचा परिसर आता बकास दिसत आहे. कुजलेल्या भातशेतीच्या काड्यांचे अवशेषच फक्त दिसत आहेत. हे ओसाड चित्र पाहून शेतकरी चिंताग्रस्त झाले आहेत. हातातोंडाशी आलेला घास हिरावला गेल्याचे दुःख शेतकऱ्यांच्या चेहऱ्यावर दिसून येत आहे.

वर्षभर लागणारे धान्य हे शेतकरी या शेतजमिनीतून पिकवित असतात; परंतु सर्वच पीक वाया गेल्यामुळे आता काय करावे, या विवंचनेत ते आहेत. पूर ओसरल्यानंतर सहा दिवस उलटले तरीही शेकडो एकर भातशेती कुजलेल्या परिसराकडे फिरकण्यास प्रशासकीय यंत्रणेला वेळ मिळालेला नाही. कुणीही प्रशासकीय अधिकारी आणि कृषी अधिकारी आजमितीस या भागात आलाच नाही, असे शेतकऱ्यांचे म्हणणे आहे. त्यामुळे नुकसानीचे पंचनामेदेखील झालेले नाहीत. पंचनामे होऊन नुकसानभरपाई  कधी मिळणार, असा प्रश्‍न शेतकऱ्यांमधून विचारला जात आहे.