परभणी जिल्ह्यात ‘कर्जमुक्ती’पासून सहा हजारांवर शेतकरी वंचित

परभणी ः महात्मा जोतिराव फुले शेतकरी कर्जमुक्ती योजनेअंतर्गत जिल्ह्यातील १ लाख ८२ हजार ४४६ शेतकऱ्यांच्या खात्यांवर १ हजार १३७ कोटी ९० लाख रुपये हस्तांतरित करण्यात आले. परंतु कर्जमाफीची रक्कम जमा न झाल्यामुळे ६ हजार २३९ शेतकरी या योजनेच्या लाभापासून वंचित आहेत. खात्यावर बाकी शिल्लक आहे. त्यामुळे त्यांना नवीन कर्ज मिळणे कठीण झाले आहे.

कर्जमुक्तीसाठी १ एप्रिल २०१५ ते ३१ मार्च २०१९ या कालावधीमध्ये पीककर्ज घेतलेले शेतकरी पात्र आहेत. या अंतर्गत  जिल्ह्यातील २ लाख ८ हजार ४१३ कर्जखाती पोर्टलवर अपलोड करण्यात आली आहेत. आजवर प्राप्त आठ याद्यांनुसार एकूण १ लाख ९२ हजार ९९९३ कर्जखात्यांच्या विशिष्ट क्रमांकासह प्राप्त झाले आहेत. या योजनेच्या लाभासाठी पात्र शेतकऱ्यांना आधार प्रमाणीकरण करणे अनिवार्य होते. त्यासाठी अनेक वेळा मुदतवाढ देण्यात आली.

सोमवार (ता. १५ नोव्हेंबर) पर्यंतची अंतिम मुदत देण्यात आली होती. या कालावधीत एकूण १ लाख ८८ हजार ६८५ शेतकरी खातेदारांनी आधार प्रमाणीकरण केले आहे. अजून ३ हजार ६०१ कर्जखात्यांचे आधार प्रमाणीकरण शिल्लक राहिले आहे. आधार प्रमाणीकरण प्रलंबित असलेल्या कर्जखात्यांमध्ये मयत व्यक्ती, अल्प कर्ज रक्कम असलेली खाती आहेत, असे सहकार विभागाच्या सूत्रांनी सांगितले.