किसान रेल्वेतून सहा टन शेतीमालाची वाहतूक 

नागपूर ः नाशवंत शेतीमालाची कमी वेळात आणि कमी दरात वाहतूक व्हावी यासाठी ऑपरेशन ग्रीन अंतर्गत किसान रेल्वेचा पर्याय उपलब्ध करून देण्यात आला होता. याला विदर्भातील संत्रा उत्पादक शेतकऱ्यांचा प्रतिसाद मिळत अवघ्या अडीच महिन्यांत किसान रेल्वेच्या माध्यमातून सहा हजार टनांहून अधिक माल निर्यात करण्यात आला. 

माहिती अधिकार कार्यकर्ता अभय कोलारकर यांनी माहितीच्या अधिकारांतर्गत मध्ये रेल्वेला विचारणा केली होती. ऑपरेशन ग्रीन अंतर्गत नागपुरातून किती माल बाहेर पाठविण्यात आला. रेल्वे वाहतुकीतून रेल्वेला किती महसूल प्राप्त झाला आदी प्रश्‍न त्यातून विचारण्यात आले. मध्ये रेल्वेकडून प्राप्त झालेल्या माहितीनुसार, अन्नप्रक्रिया उद्योग मंत्रालयातर्फे ऑपरेशन ग्रीन सुरू करण्यात आले. किसान रेल्वेतून माल पाठविल्यास शेतकऱ्यांना वाहतूक खर्चात ५० टक्‍के सवलत मिळेल, असे त्यानंतर १३ ऑक्‍टोबर रोजी काढण्यात आलेल्या परिपत्रकातून सरकारने जाहीर केले. लगेच दुसऱ्या दिवशी १४ ऑक्टोबर २०२० पासून किसान रेल्वे सुरू करण्यात आली. याव्दारे ३१ डिसेंबरपर्यंत ६ हजार १७९ टन मालाची वाहतूक करण्यात आली. मध्ये रेल्वेला यातून १ कोटी ९९ लाख रुपयांचा महसूल प्राप्त झाला. 

वाहतूकदारांचा विरोध  देशांतर्गत व्यापारी, शेतकऱ्यांचा किसान रेल्वेला प्रतिसाद मिळाला. मध्य प्रदेशातील वाहतूकदारांनी याला विरोध केला आहे. इंदूर ट्रान्स्पोर्ट असोसिएशनने मालवाहतूक व्यवसायात असलेल्यांची यामुळे आर्थिक कोंडी झाल्याचा आरोप केला आहे. ट्रान्स्पोर्ट व्यवसाय कोरोना लॉकडाउनमुळे अडचणीत आला होता. किसान रेल्वेमुळे या अडचणीत भर पडली. त्यामुळे किसान रेल्वेच्या पर्यायाचा पुनर्विचार करावा, अशी मागणी असोसिएशनने केली आहे.  संत्रा उत्पादकांचा मिळाला प्रतिसाद  नागपुरी संत्रा चव आणि रंगाबाबत वेगळेपण जपणारा आहे. मात्र याची टिकवणक्षमता कमी आहे. परिणामी, रस्ते मार्गाने गेल्यास फळ खराब होण्याची शक्‍यता अधिक राहते. किसान रेल्वेच्या माध्यमातून स्वस्त आणि गतिमान पर्याय शेतकऱ्यांना उपलब्ध झाला, त्यामुळेच शेतकऱ्यांचा त्याला व्यापक प्रतिसाद मिळाला अशी माहिती महाऑरेंजचे कार्यकारी संचालक श्रीधर ठाकरे यांनी दिली.