जळगाव : कांदा दरात किंचित सुधारणा, आवकेत घट

जळगाव : खानदेशातील प्रमुख बाजार समित्यांमध्ये उन्हाळ लाल कांद्याची आवक वाढलेली नाही. दरात क्विंटलमागे ५० ते ६० रुपयांनी सुधारणा झाली आहे. काही बाजारांमध्ये किमान दरातही बऱ्यापैकी वाढ झाली आहे. कांद्याचे कमाल ८५०, तर किमान दर ४०० रुपये प्रतिक्विंटलपर्यंतचे असल्याची माहिती मिळाली. 

जळगाव, किनगाव (ता. यावल), अडावद (ता. चोपडा), चाळीसगाव, धुळे, साक्री (जि. धुळे) येथील बाजारात कांद्याची आवक रखडत सुरू आहे. अनेक भागांत आगाप उन्हाळ कांद्याची काढणी सुरू आहे. परंतु, शेतकरी लगेच कांदा बाजारात आणत नसल्याची स्थिती आहे. त्यांना अपेक्षित दरांची प्रतीक्षा आहे. जळगाव बाजार समितीत प्रतिदिन ५०० क्विंटल लाल कांद्याची आवक मागील तीन-चार दिवसांत झाली. पुणे, नगर येथील कांद्याची आवक अजून या बाजारात नाही. 

साक्री, पिंपळनेर व धुळे येथील बाजारात प्रतिदिन १०००, अडावद व किनगाव येथील बाजारात ४०० क्विंटलपर्यंतची आवक होत आहे. चाळीसगाव येथील बाजारातही दोन-तीन दिवसच आवक अधिक होत आहे. पांढऱ्या कांद्याची धुळे, जळगावात नगण्य आवक आहे. जळगावात दर शनिवारी पांढऱ्या कांद्याची आवक मध्य प्रदेश व यावल, सिल्लोड, सोयगाव (जि. औरंगाबाद) भागांतून होते. पांढऱ्या कांद्याचे दर प्रतिक्विंटल ९००, लाल कांद्याचे दर मागील आठवड्यात ८०० रुपये प्रतिक्विंटलपर्यंत होते. किमान दर ३०० रुपयांपर्यंत होते.

किमान व कमाल दरात सुधारणा झाल्याने शेतकऱ्यांना काहीसा दिलासा मिळाला. यावल, जळगाव भागांत काढणी वेगाने सुरू नाही. त्यास वेग आल्यानंतर बाजारातील आवक वाढेल, असे सांगण्यात आले.