जळगाव बाजार समितीच्या विस्ताराची कार्यवाही थंडच

जळगाव : जिल्ह्यात प्रमुख बाजार समित्यांमध्ये गणल्या जाणाऱ्या येथील कृषी उत्पन्न बाजार समितीच्या विस्तारासंबंधीची कार्यवाही संथच आहे. नवीन बाजार समितीसाठी जमीन खरेदी, जमीन मोजणी याबाबतची प्रक्रियाच सुरू नसल्याची माहिती आहे.

जळगाव बाजार समिती सध्या औद्योगिक वसाहतीनजिक आहे. नागपूर - धुळे महामार्ग व औरंगाबाद - जळगाव राज्य मार्गावर ही बाजार समिती आहे. सद्यःस्थितीत बैलगाडी या बाजार समितीपर्यंत पोचायला अनेक तास लागतील, एवढी वाहतूक कोंडी असते. यामुळे बाजार समितीच्या विस्ताराची चर्चा तीन वर्षांपूर्वी सुरू झाली .  जळगाव शहरानजीक मन्यारखेडा व खेडी बुद्रुक शिवारात १९ एकर जमीन खरेदी करायचा प्रस्ताव तत्कालीन सभापती संतोष नारखेडे यांनी ठेवला. ही प्रक्रिया सुरू होत असतानाच सभापती बदलले. लक्ष्मण पाटील हे सध्या सभापती आहेत. बाजार समितीत सुमारे १०२ कर्मचारी असून, त्यांचे वेतन व इतर खर्चासाठी उत्पन्न वाढीची सर्कस करण्यातच संचालकांचा अधिकचा वेळ खर्च होत आहे. यामुळे बाजार समितीच्या विस्तारासाठी नव्या जागेची खरेदी व इतर कार्यवाहीच ठप्प झाली आहे.

विस्तारीत बाजार समितीत फळे व भाजीपाला मार्केट यार्ड आणि धान्य मार्केटच उभारण्यासंबंधी आराखडा तयार केला होता. दुकाने दीर्घ मुदतीने भाडेकरारावर द्यायची, तोलकाटा, शेतकरी निवास, पशुधनाला पाणी पिण्यासाठी हाळ आदी व्यवस्था करायची योजना त्यात आहे. नवी प्रस्तावित बाजार समिती हीदेखील राष्ट्रीय महामार्ग क्रमांक सहा (नागपूर - धुळे) वर आहे. परंतु या बाजार समितीपर्यंत जाताना वाहतूक कोंडीचा अधिक सामना करावा लागणार नाही. शिवाय पुढील काही वर्षांत राष्ट्रीय महामार्ग क्रमांक सहावर भुसावळ - जळगावदरम्यान सिमेंटचा चौपदरी रस्ता होणार असल्याने वाहतूक आणखी सुकर होईल, असे सांगितले जाते.