पुणे बाजार समितीत ‘ई-नाम’ची अंमलबजावणी संथगतीने

पुणे :  शेतीमालाच्या ऑनलाइन लिलावांतून देशांतर्गत बाजारपेठ उपलब्ध व्हावी, या उद्देशाने सुरू करण्यात आलेल्या ऑनलाइन राष्ट्रीय बाजारची (ई-नाम) अंमलजावणी पुणे बाजार समितीत होत नसल्याचे चित्र आहे. पुणे बाजार समितीत पहिल्या टप्प्यात गुळाचा समावेश ‘ई-नाम’ मध्ये करण्यात आला होता. मात्र, व्यापाऱ्यांनी विविध कारणे देत संघटित विरोध करून ही योजना हाणून पाडली. डाळिंबाचा या योजनेत समावेश करण्यात आला, मात्र डाळिंबाच्या एकूण आवकेच्या २५ टक्केच लिलाव ऑनलाइन होत असल्याचा दावा बाजार समितीने केला आहे.

दोन वर्षांपूर्वी केंद्राच्या ई-नाम योजनेत राज्यात पहिल्या दोन टप्प्यांत ६० बाजार समित्यांचा समावेश करण्यात आला. ई-नाममध्ये प्रामुख्याने धान्याचे ऑनलाइन लिलाव सुरू करण्यात आले. त्यानंतर गूळ, कांदा आणि डाळिंबाचा समावेश करण्यात आला. 

दुसऱ्या टप्प्यात पुणे बाजार समितीचा समावेश करण्यात आला. शेतकऱ्यांच्या शेतीमालाचे ऑनलाइन लिलाव करून, त्याला राष्ट्रीय बाजारातील स्पर्धात्मक दर मिळण्याचा हेतू या योजनेचा आहे. पुणे बाजार समितीमध्ये गुळाचा समावेश करण्यात आला. मात्र, गुळाच्या दर्जाचे कारण देत व्यापाऱ्यांनी ऑनलाइन लिलाव करण्यास असमर्थतता दर्शविली. यानंतर डाळिंबाचा समावेश करण्याचे आदेश पणन मंडळाने बाजार समितीला दिले. यासाठी शेतकरी, आडते, खरेदीदारांची नोंदणी देखील करण्यात आली. मात्र अद्यापही डाळिंबाचे ऑनलाइन लिलाव होत नसल्याचे सध्याचे वास्तव आहे.