अन्नसुरक्षेत लहान शेतकरीच महत्त्वाचा

मिलान, इटली : जगभरातील ९० टक्के शेतकरी लहान व अल्पभूधारक अाहेत. ८० टक्के अन्न उत्पादनात त्यांचा वाटा असल्याने हेच शेतकरी अन्न सुरक्षा व शाश्वत विकासासाठी महत्वाचे आहे. नावीन्यता आणि तरुण वर्गाचा शेतीमधील सहभाग केंद्रस्थानी ठेवून काम करण्याचा निर्धार येथे करण्यात आला.  जागतिक फुड इन्होवेशन समिटचे ७ ते १० मे दरम्यान आयोजन करण्यात आले होते. परिषदेचे उद्‌घाटन अमेरिकेचे माजी परराष्ट्र सचिव जॉन केरी केली. श्री. केरी यांनी पोषणतत्त्व सुरक्षा, अपारंपरिक ऊर्जा तंत्रज्ञान आणि हवामान बदल या विषयांच्या अनुषंगाने छोट्या शेतकऱ्यांना साह्य करून शाश्वत विकासाची उद्दिष्ट गाठण्याचे आव्हान केले. या परिषदेत प्रथमच शेतकऱ्यांवर विशेष सत्राचे आयोजन करण्यात आले होते. नेदरलँड्सच्या प्रिन्सेस व्हिक्टोरिया यांच्या नेतृत्वाखाली भारत, सुदान, अल्जेरिया, होंडोरस, दक्षिण आफ्रिका, अमेरिका येथील शेतकऱ्यांचा समावेश असणाऱ्या विशेष शिष्टमंडळाने ‘भविष्यातील शेती आणि बदल'' या सत्रात आपला सहभाग नोंदविला. शिष्टमंडळातील भारतीय शेतकऱ्यांचे प्रतिनिधीत्व महाएफपीसीचे अध्यक्ष आणि व्यवस्थापकीय संचालक योगेश थोरात यांनी केले. या वेळी नेदरलँड्सच्या उपपंतप्रधान क्ररोला स्काउटेन, IFAD चे अध्यक्ष गिल्बर्ट होंबो, तसेच एफएओ, WFP ( World Food Program ) यांचे प्रमुख पदाधिकारी व या क्षेत्रात काम करणारे जगभरातील मान्यवर उपस्थित होते. यानंतर या शिष्टमंडळाने व्हॅटीकन सिटी येथे पोप फ्रान्सिस यांची भेट घेतली आणि पोप यांनी लाखोंच्या समुदायाला संबोधित करताना या शिष्टमंडळाचा विशेष उल्लेख करून जगाचे पोशिंदे असणाऱ्या लहान लहान व छोट्या शेतकऱ्यांप्रती कृतज्ञता व्यक्त केली आणि शुभेच्छा व आशीर्वाद दिले. रोम येथील IFAD ( International Fund For Agriculture Development) च्या मुख्य कार्यालयात शिष्टमंडळाचे परिषदेमधील अनुभव कथन व आंतरराष्ट्रीय समुदायाकडून असणाऱ्या अपेक्षा यावर चर्चा करण्यासाठी विशेष बैठकीचे आयोजन करण्यात आले होते. या वेळी संयुक्त राष्ट्र संघटनेच्या कृषी क्षेत्रात काम करणाऱ्या संस्थांचे प्रतिनिधी, विविध देशांतील राजदूत कार्यालयातील कृषी अधिकारी चर्चेत सहभागी झाले होते. या परिषदेच्या माध्यमातून लहान व छोट्या शेतकऱ्यांच्या समस्या, आव्हाने याकडे आंतरराष्ट्रीय स्तरावर लक्ष वेधल्याने या विषयाकडे अधिक गांभीर्याने विचार करून काम करण्याची गरज निर्माण झाली असल्याचे मत तज्‍ज्ञांनी व्यक्त केले आहे.