लहान व्यावसायिकांना मिळणार महावितरणच्या ‘वॉलेट’द्वारे उत्पन्न

सोलापूर : महावितरणने वीजबिल भरण्यासाठी ‘वॉलेट’द्वारे रोजगाराची संधी निर्माण केली आहे. ‘वॉलेट’द्वारे वीजबिलांचा भरणा केल्यास प्रतिपावतीमागे ५ रुपये कमिशन देण्यात येईल. छोट्या व्यावसायिकांना या ‘वॉलेट’द्वारे अतिरिक्त उत्पन्न मिळविण्याची संधी उपलब्ध झाली आहे.

महावितरणतर्फे वीजबिलांचा भरणा करण्यासाठी मोबाईल अॅपसह आॅनलाइन सेवा उपलब्ध करण्यात आल्या आहेत. त्यानंतर आता महावितरणने स्वतःचे पेमेंट ‘वॉलेट’ आणले आहे. त्याद्वारे वीजग्राहकांना स्वतःचे वीजबिल भरता येईल. त्याचप्रमाणे बचत गट, किराणा दुकानदार आदी छोटे-मोठे व्यावसायिक, महावितरणचे वीजबिल वाटप व रीडिंग घेणाऱ्या संस्थांना या ‘वॉलेट’द्वारे ग्राहकांच्या वीजबिलांचा भरणा करून उत्पन्न मिळविता येईल.

‘वॉलेट’ नोंदणीसाठी महावितरणच्या www.mahadiscom.in या अधिकृत संकेतस्थळावर आॅनलाइन अर्ज उपलब्ध आहेत. त्यानंतर संबंधित उपविभाग कार्यालयाकडून अर्जदारांच्या अर्जांची व जागेची पडताळणी करण्यात येईल. त्यासाठी कोणतेही शुल्क नाही. ‘वॉलेट’धारकाने प्रथम कमीत कमी ५ हजार रुपयांचे रिचार्ज करणे आवश्यक आहे. त्यानंतर १ हजार रुपयांच्या पटीत रिचार्ज वाढविता येईल. डेबिट कार्ड, क्रेडिट कार्ड, नेटबँकिंगद्वारे रिचार्जची सोय उपलब्ध आहे. 

रिचार्ज केल्यानंतर ‘वॉलेट’ अॅपद्वारे महावितरणच्या वीजग्राहकांकडून वीजबिलांची वसुली करता येईल. वीजबिलांचा भरणा केल्यानंतर संबंधित ग्राहकांच्या भ्रमणध्वनी क्रमांकावर संदेश पाठविला जाईल. विशेष म्हणजे, एका ‘वॉलेट’मधील शिल्लक रक्कम वापरून सबवॉलेटद्वारे एकापेक्षा अधिक व्यक्ती ग्राहकांच्या वीजबिलांचा भरणा करू शकतील. अधिक माहितीसाठी नजीकच्या महावितरण कार्यालयाशी संपर्क साधावा, असे आवाहन महावितरणने केले आहे.