सोलापूर जिल्ह्यात भिज पाऊस, जोर नाहीच

सोलापूर  ः गेल्या अनेक दिवसांपासूनच्या प्रदीर्घ विश्रांतीनंतर जिल्ह्यात गेल्या दोन दिवसांपासून पुन्हा पावसाने सुरुवात केली. मात्र, भिज पाऊस होत आहे. त्यामध्ये जोर मात्र कसलाच नाही. शुक्रवारी (ता.१४) पहाटेही काही ठिकाणी पावसाने हलकी हजेरी लावली. पण. नंतर दिवसभर कधी ऊन, तर कधी ढगाळ वातावरण राहिले. 

शुक्रवारी सकाळपासूनच वातावरण ढगाळ आहे. अनेक भागात सूर्यदर्शनही उशिरा झाले. माळशिरस, माढा, मोहोळ, बार्शी, करमाळा भागात असा सर्वदूर बुधवारपासून पाऊस होतो आहे. दिवसभर कधी ऊन, कधी ढगाळ असे वातावरण राहते आहे. त्यानंतर सायंकाळी मात्र पाऊस हमखास हजेरी लावतो आहे. शुक्रवारीही दिवसभर पुन्हा काहीशी अशीच स्थिती होती. तत्पूर्वी पहाटे काही भागात मात्र पावसाने हलकी हजेरी लावली. 

जिल्ह्यात पावसाने यंदा वेळेवर हजेरी लावली. जून आणि जुलैमध्येही पावसाने सातत्य ठेवले. त्यामुळे यंदा पहिल्यांदाच पावसाने या दोन्ही महिन्यांची सरासरी गाठली. आता ऑगस्टमध्ये मात्र त्याने काहीशी विश्रांती घेतली होती. पण, गेल्या दोन दिवसांपासून पुन्हा सुरुवात केली आहे. पण, त्यात फारसा जोर नाही. केवळ भिज पाऊस होतो आहे. खरिपातील तूर, मूग, सोयाबीन, उडीद या पिकांना हा पाऊस पोषक मानला जातो आहे. त्यामुळे यंदा खरीपातील पिके उत्तम स्थितीत आहेत.

उजनीची पाणीपातळी ३२.२९ टक्के

उजनी धरणातील पाणलोट क्षेत्रात सातत्याने होणाऱ्या पावसामुळे वरच्या धरणातील पाण्याचा विसर्ग वाढला आहे. शुक्रवारी दौंडकडून १३ हजार ५८५ क्युसेक इतका विसर्ग उजनी धरणात येत होता. त्यामुळे पाणी पातळीत झपाट्याने वाढ होत आहे. शुक्रवारी धरणातील एकूण पातळी ४९३.२६५ मीटरपर्यंत होती. तर, एकूण पाणीसाठा ८०.९६ टीएमसी, तर त्यापैकी उपयुक्त साठा १७.३० टीएमसी इतका होता. तर, पाण्याची पातळी ३२.२९ टक्केपर्यंत होती.