सांगली : जिल्ह्यात खरीप हंगामाची तयारी अंतिम टप्प्यात आली आहे. मे महिन्याच्या दुसऱ्या आठवड्यापासून सोयाबीनची पेरणीस प्रारंभ होईल. त्यामुळे कृषी विभागाने दहा हजार क्विंटल सोयाबीनचे बियाण्याची मागणी केली आहे. जिल्ह्यात उन्हाळी सोयाबीनची १२२ हेक्टरवर पेरणी झाली असून, बियाणे कमी पडणार नाही, असा दावा कृषी विभागाने केला आहे.
जिल्ह्यात खरिपाचे सरासरी क्षेत्र ३ लाख ७७ हजार हेक्टर इतके आहे. त्यापैकी सोयाबीनचे सरासरी क्षेत्र ५७ हजार १६१ हेक्टर इतके आहे. गतवर्षी ४१ हजार ६५१ हेक्टरवर सोयाबीनची पेरणी झाली होती. वास्तविक पाहता, जिल्ह्यातील कृष्णा-वारणेच्या नदीकाठी आणि बागायत पट्ट्यात मे महिन्याच्या दुसऱ्या आठवड्यापासून सोयाबीनची पेरणीस प्रारंभ होतो. त्यामुळे कृषी विभागाने सोयाबीनची ९७२५ क्विंटल बियाणाची मागणी केली आहे. शेतकऱ्यांनी सोयाबीन पेरणीची पूर्व मशागती सुरू केल्या असून, काही दिवसांत पेरणी सुरू करण्याचे नियोजन शेतकरी करू लागला आहे.
जिल्ह्यात दर वर्षी १५ ते १६ हजार क्विंटल सोयाबीनचे बियाणे लागते. गेल्या वर्षी सोयाबीनचे दहा हजार क्विंटल बियाणे आले होते. तरी देखील काही प्रमाणात बियाणांचा तुटवडा भासला होता. मात्र, यंदा सोयाबीनला खुल्या बाजारात ६००० ते ६,५०० रुपये प्रति क्विंटल दर मिळू लागला असल्याने बहुतांश शेतकऱ्यांनी सोयाबीनची विक्री केली आहे.
बियाणांची कमतरता भासू नये यासाठी कृषी विभागाने उन्हाळी सोयाबीन पेरणीसाठी शेतकऱ्यांना प्रोस्ताहित केले. यामुळे जिल्ह्यात १२२ हेक्टरवर सोयाबीनची पेरणी झाली आहे. सोयाबीन पिकासाठी कृषी विभागाने मार्गदर्शन केले असल्याने उन्हाळी सोयाबीन हे बियाणे म्हणून वापरता येईल, असा दावा कृषी विभागाने केला आहे.
बियाणे टंचाई होण्याची शक्यता मे महिन्यापासून सोयाबीनची पेरणी केली जाते. मात्र, जिल्ह्याच्या इतर भागात पुरेसा पाऊस झाल्यानंतर पेरणीसाठी शेतकरी पुढे येतात. त्यामुळे विलंबाने पेरणी करणाऱ्या शेतकऱ्यांना बियाणे टंचाईला समोरे जावे लागण्याची शक्यता आहे.
प्रतिक्रिया बियाणांची कमतरता भासू नये, यासाठी शेतकऱ्यांना उन्हाळी सोयाबीन पेरणीसाठी प्रोत्साहित केले आहे. तसेच शेतकऱ्यांनी घरचे बियाणे वापरावे. कृषी विभागाने सोयाबीनची उगवण क्षमता आणि बीजप्रक्रिया प्रात्यक्षिके घेण्यास प्रारंभ केला आहे. जिल्ह्यात आत्तापर्यंत ३०९ प्रात्यक्षिके घेतली आहे. सुरेश मगदूम, कृषी उपसंचालक, सांगली
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.