ऊस बिलासाठीच्या सॉफ्टलोन योजनेला मुदतवाढ शक्य

कोल्हापूर : शेतकऱ्यांची थकीत ऊस बिले देण्यासाठी केंद्र शासनाने जाहीर केलेल्या सॉफ्ट लोन योजनेची मुदत आणखी महिनाभर वाढणार आहे. या संबंधीचे आदेश लवकरच काढण्यात येतील, असे आश्‍वासन केंद्रीय अन्न सचिव रविकांत यांनी राष्ट्रीय सहकारी साखर महासंघाच्या पदाधिकाऱ्यांना दिले.  कर्ज उचलण्याची मुदत शुक्रवारपर्यंत (ता.३१) होती. मुदत कमी असल्याने कर्ज मिळण्याची प्रक्रिया रखडण्याची शक्‍यता निर्माण होत होती. परिणामी कारखान्यांना या योजनेचा फायदा होण्याची शक्‍यता धूसर होती. या पार्श्‍वभूमीवर साखर संघाचे अध्यक्ष दिलीप वळसे पाटील, व्यवस्थापकीय संचालक प्रकाश नाईकनवरे आदी पदाधिकाऱ्यांनी केंद्रिय अन्नसचिव रवी कांत, साखर सहसचिव सुरेश कुमार, पंतप्रधान कार्यालतील साखरेचा विषय हाताळणारे सहसचिव श्रीकर परदेशी यांची स्वतंत्रपणे भेट घेतली. साखर उद्योगाबाबत पाच वर्षांचा आराखडा केंद्राला सादर करण्याचा निर्णयदेखील घेण्यात आला.  यंदेशातील ५३० कारखान्यांना दहा हजार ५४० कोटी रुपयांचे सॉफ्टलोन देण्याची प्रक्रिया सुरू झाली आहे. त्यासाठी सात टक्के व्याज अनुदानदेखील मिळणार आहे. मात्र, योजनेची मुदत शुक्रवारी (ता.३१) संपली आहे. त्यामुळे अर्जासाठी एक महिन्याची तर योजनेच्या कालावधीला दोन वर्षांची मुदतवाढ मिळण्याचा आग्रह संघाने धरला होता. त्याला केंद्राने मान्यता दिली आहे.   यंदा देशात ४३४ लाख टन साखरेची उपलब्धता असून त्यातून २६० लाख टन देशांतर्गत वापर व ३५ लाख टनाची निर्यात होईल. तरीही पुढील हंगामाच्या सुरवातीला १३९ लाख टन साखर शिल्लक राहणार असल्याने आव्हान मोठे असेल, असे संघाच्या वतिने केंद्राकडे स्पष्ट करण्यात आले. आव्हानात्मक स्थिती हाताळण्यासाठी राखीव साठा ३० लाख टनावरून ५० लाख टन करणे, ८० लाख टनापर्यंत निर्यात नेणे, किमान विक्री दरात वाढ करणे, कोटा पद्धत चालू ठेवणे असे उपाय राष्ट्रीय संघाने केंद्रासमोर ठेवले आहेत. 

दानवेंमुळे साखरउद्योगात समाधान  राज्यातील साखर कारखान्यांना केंद्रीय अन्नमंत्री रावसाहेब दानवे यांच्यामुळे आधार मिळण्याची चिन्हे आहेत. रामेश्वर सहकारी साखर कारखान्याचे संस्थापक अध्यक्ष असलेल्या दानवेंकडे आता देशाच्या साखर उद्योगाचे धोरण ठरविण्याचा विषय असेल. त्यांची निवड आशादायक असून कारखान्यांच्या समस्यांबाबत त्यांच्याशी सविस्तर चर्चा केली जाण्याची शक्यता आहे, अशी माहिती संघाकडून देण्यात आली. 

साखर तज्ज्ञांचे लवकरच चर्चासत्र  अधिकाऱ्यांबरोबर झालेल्या बैठकीतील विषयाबाबत सविस्तर चर्चा करण्यासाठी लवकरच एकदिवसीय चर्चासत्र आयोजित करणार आहे. या मध्ये केंद्रातील संबधित अधिकारी, देशातील साखर उद्योचे प्रतिनिधी, व विषय तज्ज्ञ यांचा सहभाग असणार आहे. यावर आधारित पाच वर्षांचा कार्य आराखडा प्रस्तावित करण्यात येणार असल्याचे श्री वळसे पाटील यांनी या वेळी सांगितले.