पुणे जिल्ह्यात तीन लाख जमीन आरोग्यपत्रिकांचे वाटप

संग्रहित छायाचित्र
संग्रहित छायाचित्र

पुणे   ः जमिनीतील विविध घटकांची माहिती शेतकऱ्यांना मिळावी यासाठी जमीन आरोग्यपत्रिका अभियान दोन वर्षांपासून राबविण्यात येत आहे. त्याअंतर्गत जिल्ह्यात ९८ हजार ४१८ मृदा नमुने तपासण्यात आले, तर दोन लाख ९८ हजार ७६४ जमीन आरोग्यपत्रिकांचे वाटप करण्यात आले आहे.  

शेतकऱ्यांना शेतजमिनीतील माती परीक्षणाद्वारे जमिनीतील अन्नद्रव्यांचे प्रमाण जाणून घेणे, त्यानुसार पुढील हंगामात घेतल्या जाणाऱ्या पिकांसाठी खतमात्रांची शिफारस करण्यात येते. मागील दोन वर्षांपासून मृदा आरोग्यपत्रिकांचे वाटप करण्यात येत आहे. त्यासाठी दरवर्षी माती नमुने घेतले जातात. गेल्या वर्षी या अभियानाचा दुसरा टप्पा सुरू झाला आहे.

या दुसऱ्या टप्प्यात (२०१७-१८) ९१० गावांमध्ये ८६,५९२ माती नमुने तपासले असून ३ लाख ३५ हजार ९८८ जमीन आरोग्य पत्रिका वितरित करण्यात आल्या आहेत. चालू वर्षी जमीन आरोग्य पत्रिका योजनेअंतर्गत ९२२ गावांसाठी एक लाख चार हजार ९०८ मृदा नमुने घेण्याचा लक्ष्यांक देण्यात आला आहे. तसेच तीन लाख २२ हजार ९०८ आरोग्य पत्रिका वाटपाचा लक्ष्यांक देण्यात आला आहे.

निवडलेल्या गावातील लागवडीयोग्य असलेल्या क्षेत्रामधून बागायत क्षेत्रासाठी अडीच हेक्टर व जिरायती क्षेत्रासाठी दहा हेक्टर क्षेत्रामधून एक मृदा नमुना काढण्यात येतो. क्षेत्रीय पातळीवर कार्यरत असलेल्या कृषी विभागाच्या यंत्रणेमार्फत मृदा नमुने काढले जातात. त्यानंतर ते विश्लेषणासाठी मृदा चाचणी प्रयोगशाळेत पाठविण्यात येतात. या प्रयोगशाळेत मृदा नमुना प्राप्त झाल्यानंतर विश्लेषणासाठी मृदा नमुना तयार करण्यात येतो. हा नमुना तयार झाल्यानंतर पुढील घटकांसाठी या नमुन्याची तपासणी प्रयोगशाळेत केली जाते. केंद्र शासनाच्या मार्गदर्शक सुचनेनुसार एकूण बारा घटकांची विहित पद्धतीने तपासणी करण्यात येते. 

कृषी सहायकांनी मृदा नमुने गोळा करण्यासाठी प्रशिक्षित, माहितगार तज्ज्ञ, शेतकरी किंवा गावातील आत्माअंतर्गत नियुक्त केलेल्या कृषी मित्रांची मदत घेण्याच्या सूचना होत्या. तसेच संबंधित कृषी सहायकांनी गावातील मृदा नमुने काढण्यापूर्वी कालावधी निश्चित करून गावात दवंडी देणे, किंवा ग्रामपंचायत नोटीस बोर्डावर सूचना लिहून गावातील शेतकऱ्यांच्या सहभाग वाढविण्यात आला आहे, अशी माहिती कृषी विभागाच्या सूत्रांनी दिली. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com