गोंदियातील कृषी सेवा केंद्रे लावणार जमीन आरोग्यदर्शक फलक

गोंदिया   ः जमिनीची गरज ओळखूनच खताची मात्रा देत त्या माध्यमातून शेतकऱ्यांची उत्पादकता खर्चात बचत व्हावी, यासाठी जिल्हा अधीक्षक कृषी अधिकारी भाऊसाहेब बऱ्हाटे यांनी पुढाकार घेतला आहे. त्याअंतर्गत गोंदिया जिल्ह्यातील प्रत्येक कृषी सेवा केंद्रधारकांना दुकानात आपल्या भागातील जमिनीचे आरोग्य दर्शविणारे फलक (सॉइल हेल्थ कार्ड) लावण्याचे आदेश देण्यात आले आहेत.

केंद्र सरकारने शेतकऱ्यांसाठी जमिनीची आरोग्यपत्रिका योजना राबविली होती. परंतु त्यातील विश्‍लेषणाच्या आधारे शेतकऱ्यांनी अपवाद वगळता खताची मात्रा दिल्याचे उदाहरण नाही. याची दखल घेत जिल्हा अधीक्षक कृषी अधिकारी भाऊसाहेब बऱ्हाटे यांनी थेट कृषी सेवा केंद्रधारकांनाच दुकानाच्या दर्शनीय भागात त्या भागातील जमिनीचे आरोग्य दर्शविणारे फलक लावण्याचे आदेश दिले आहेत. २.५ बाय ४ फूट आकाराचे हे फलक असणार आहेत.

त्या भागातील जमिनीत असलेल्या पूरक घटकांची माहिती त्यावर नोंदविलेली असेल. कृषी सेवा केंद्र संचालक त्याआधारे खत खरेदीसाठी आलेल्या शेतकऱ्यांना माहिती सांगून आवश्‍यक त्याच खतांची विक्री करणार आहेत. या माध्यमातून खतांवरील अनावश्‍यक खर्च वाचणार असून, जमिनीलादेखील गरजेनुरूपच अन्नद्रव्याची मात्रा मिळण्याचा उद्देश साध्य होणार आहे.