माती,पाणी व्यवस्थापन द्राक्ष उत्पादनाचा पाया

नाशिक  :  माती, पाणी व्यवस्थापन हा दर्जेदार द्राक्ष उत्पादनाचा पाया आहे. त्याकडे प्राधान्याने लक्ष द्यावे. असा सूर ''द्राक्ष मंथन'' परिषदेत उमटला.

‘ॲग्रोकेअर कृषी मंच`तर्फे शुक्रवारी (ता. २८) ओझर येथील सिद्धिविनायक लॉन्स येथे ''द्राक्ष मंथन २०१८'' या कार्यक्रमाचे आयोजन करण्यात आले. बी. व्ही. जी. ग्रुपचे अध्यक्ष हणमंतराव गायकवाड यांच्या हस्ते परिषदेचे उद्‍घाटन करण्यात आले. राज्य द्राक्ष बागायतदार संघाचे माजी अध्यक्ष अशोक गायकवाड अध्यक्षस्थानी होते. या वेळी कृषी मंचचे अध्यक्ष भूषण निकम, कृषी उद्योजक एस. बी. काशीद, द्राक्ष बागायतदार संघाचे संचालक माणिकराव पाटील, अखिल भारतीय द्राक्ष निर्यातदार संघाचे अध्यक्ष जगन्नाथ खापरे आदी उपस्थित होते.

अ. दाभोळकर प्रयोग परिवाराचे समन्वयक वासुदेव काठे, सेंद्रिय शेती तज्ज्ञ डॉ. प्रशांत नाईकवाडी, राज्य द्राक्ष बागायतदार संघाचे संचालक अरुण मोरे, प्रयोगशील द्राक्ष उत्पादक अनंत मोरे, अरविंद भालेराव, अरविंद खोडे, हेमंत ब्रह्मेचा, मनोज जाधव यांनी परिषदेत मार्गदर्शन केले.

जमिनीतील सेंद्रिय कर्ब वाढवण्याकडे जाणीवपूर्वक लक्ष दिले पाहिजे. माती, पाणी तपासणी करणे ही सर्वांत महत्त्वाची बाब आहे. शेतीकडे विद्यापीठ म्हणून पाहिले पाहिजे, असे वक्त्यांनी सांगितले. डॉ. वसंत ढिकले यांनी सूत्रसंचालन केले. भूषण निकम यांनी आभार मानले.