सोलापूर जिल्ह्यात पंचनाम्याचे ८५ टक्के काम पूर्ण

सोलापूर  : ‘‘जिल्ह्यात ऑक्‍टोबर महिन्यात झालेल्या अतिवृष्टीचा फटका जवळपास एक लाख २५ हजार ७३९ शेतकऱ्यांना बसला  आहे. ९९ हजार ३६ हेक्‍टरचे नुकसान झाले आहे. जिल्ह्यातील १०३४ गावे बाधित झाली असून, बाधित क्षेत्रापैकी ८५.६ टक्के क्षेत्राचे पंचनामे पूर्ण झाले आहेत’’, अशी माहिती जिल्हाधिकारी डॉ. राजेंद्र भोसले यांनी दिली. 

जिल्ह्यातील जवळपास सर्वच तालुक्‍यात पावसाने नुकसान केले आहे. गेल्या पाच-सहा दिवसांपासून प्रशासनाकडून महसूल व कृषी अशा संयुक्त पथकाद्वारे पंचनाम्याचे काम सुरू आहे. नुकसानग्रस्त ९९ हजार ३६ पैकी हेक्‍टरपैकी ८४ हजार ७२८ हेक्‍टरचे पंचनामे पूर्ण झाले आहेत. १४ हजार ३०८ हेक्‍टरच्या पंचनाम्याचे काम अद्याप होणे बाकी आहे. पंचनाम्याचे उर्वरित कामही तातडीने पूर्ण करण्याची सूचना दिल्याचे डॉ. भोसले यांनी सांगितले. 

जिल्ह्यात सर्वाधिक नुकसान बार्शी तालुक्‍यात झाले आहे. तालुक्‍यातील ३२ हजार २३५ हेक्‍टर क्षेत्र बाधित झाले आहे. उत्तर सोलापूर तालुक्‍यातील पाच हजार ७२५, दक्षिण सोलापूर तालुक्‍यातील १७ हजार ४०२, अक्कलकोट तालुक्‍यातील नऊ हजार ५२१, माढा तालुक्‍यातील सहा हजार ४६५, करमाळा तालुक्‍यातील तीन हजार ३४२, पंढरपूर तालुक्‍यातील चार हजार ८३३, मोहोळ तालुक्‍यातील १६ हजार, मंगळवेढा तालुक्‍यातील १४८, सांगोला तालुक्‍यातील २५९ व माळशिरस तालुक्‍यातील तीन हजार१०५ हेक्‍टरचे नुकसान या अतिवृष्टीमुळे झाले आहे, असेही डॉ. भोसले यांनी सांगितले.

रब्बीच्या पेरण्या रखडल्या

दरम्यान, आजही रब्बीच्या पेरण्या पावसामुळे वाफसा नसल्याने रखडल्या आहेत. शिवाय आता पंचनाम्यानंतर तातडीने ही मदत मिळेल का आणि ही मदत किती मिळेल, याकडे शेतकऱ्यांचे लक्ष लागले आहे. शेतात अजूनही पाणी असल्याने पेरणीपूर्व मशागतीची कामेही झालेली नाहीत. त्यामुळे रब्बी हंगाम यंदा भलताच लांबणार असल्याची स्थिती आहे.