सोलापूर जिल्ह्यात उसावर ‘हुमणी’चा प्रादुर्भाव वाढला

सोलापूर  : जिल्ह्यात खरिपातील मूग, उडदावर विविध रोगाच्या प्रादुर्भावाने शेतकऱ्यांसमोर संकट उभे ठाकले आहे. तोच आता उसावरही हुमणी किडीचा प्रादुर्भाव वाढत आहे. त्यामुळे उत्पादनात घट होण्याची शक्यता आहे. त्यामुळे शेतकऱ्यांची चिंता वाढली आहे.  

यंदा वेळेवर पाऊस पडल्याने कधी नव्हे, ते खरिपात तूर, सोयाबीन, मूग, उडादाचा पेरा चांगला वाढला आहे. पण, ही पिके सध्या विविध किड-रोगांच्या समस्येमुळे अडचणीत आली आहेत. त्यामुळे साहजिकच शेतकऱ्यांचा भरवसा उसावर होता. पण, आता त्यावरही हुमणीचा प्रादुर्भाव वाढत आहे. त्यामुळे त्याच्या नियंत्रणासाठी शेतकऱ्यांची धावाधाव  सुरु आहे. 

जिल्ह्यातील करमाळा, पंढरपूर, माळशिरस, मोहोळ आणि मंगळवेढ्यातील काही भागात हा रोग प्रामुख्याने आढळून आला आहे. त्याचे क्षेत्र कितपत विस्तारेल, हे सध्या तरी सांगता येत नसले, तरी वातावरणातील बदल त्याला आणखीनच पोषक ठरत आहे. त्यामुळे त्यात झपाट्याने वाढ होण्याची शक्यता आहे. वास्तविक, गेल्या दोन-तीन वर्षांपासून उसावर कीड-रोगांचा फारसा प्रादुर्भाव नव्हता. पण, यंदा तो आढळून येत असल्याने शेतकऱ्यांच्या समस्यात भर पडली आहे.

ऊस दर नाही, बिलेही थकली

एकीकडे उसाला दर नसल्याने शेतकरी अडचणीत आहेत. त्यातच गेल्या दोन वर्षांपासून एफआरपीची बिले थकली आहेत. त्यासाठी वणवण सुरु असताना, आता किडरोगावर खर्च करुन पुन्हा जादा भुर्दंड बसत आहे. त्यामुळे शेतकऱ्यांचे ऊस उत्पादकांचे आर्थिक गणित बिघडले आहे. 

उसात हुमणीचा प्रादुर्भाव वाढू लागला आहे. वेळीच नियंत्रण करण्याचा प्रयत्न करतो आहे. पण, अद्याप तरी आटोक्यात नाही.  कृषि विभागाने यासाठी आम्हाला मार्गदर्शन करावे. अन्यथा, मोठे नुकसान होण्याची शक्यता आहे.   - प्रवीण नवले, ऊस उत्पादक शेतकरी, केतूर, ता. करमाळा