सोलापूर जिल्ह्यात पावसाचा पहिल्यांदाच सर्वदूर जोर

सोलापूर जिल्ह्यात पावसाचा पहिल्यांदाच सर्वदूर जोर
सोलापूर जिल्ह्यात पावसाचा पहिल्यांदाच सर्वदूर जोर

सोलापूर ः सोलापूर जिल्ह्यात गेल्या दोन दिवसांपासून सुरू असलेल्या पावसाने सोमवारी (ता. २१) मध्यरात्री पुन्हा जोरदार हजेरी लावली. बहुतांश सर्व भागात हा पाऊस पडल्याने आणि यंदाच्या पावसाळ्यातील सर्वाधिक जोरदार पाऊस झाल्याने समाधान व्यक्त होत आहे. सकाळी आठ वाजेपर्यंत पावसाची थांबून-थांबून रिपरिप सुरूच होती. त्यानंतरही दिवसभर कधी ऊन आणि कधी ढगाळ वातावरण अशी स्थिती होती. जिल्ह्यातील पंढरपूर, करमाळा, मंगळवेढा, बार्शी, माढा, मोहोळ, उत्तर सोलापूर भागात पावसाचा सर्वाधिक जोर राहिला. 

 दोन दिवसांपासून पावसाने दमदार हजेरी लावण्यास सुरवात केली आहे. यंदा पावसाने पहिल्यापासूनच जेमतेम हजेरी लावली. पावसाचा हंगामही उलटून गेला, आता मात्र पाऊस सुरू झाला आहे. शनिवारी आणि रविवारी रात्री पावसाने चांगली हजेरी लावली. त्यानंतर सोमवारी मध्यरात्री पुन्हा पावसाने जोर लावला. यंदाच्या पावसाळ्यातील हा सर्वाधिक जोर असणारा पाऊस म्हटला जातो. 

विशेषतः अक्कलकोट, उत्तर सोलापूर, दक्षिण सोलापूर आणि मोहोळच्या काही भागात पाऊसच नव्हता; पण या पावसाने या भागातील लोकांना त्यामुळे दिलासा मिळाला. उत्तर सोलापुरातील नान्नज, वडाळा, मार्डी, कारंबा भागात पहाटे दोनच्या सुमारास जोरदार पाऊस झाला. सुमारे तासभर थांबून-थांबून त्याची रिपरिप सुरू होती. करमाळा व परिसरात तीन दिवसांपासून दमदार पाऊस सुरू आहे. सोमवारी पुन्हा या पावसाने हजेरी लावली. तालुक्‍यातील ओढे, नाले भरून वाहू लागले आहेत. तलावात पाणीसाठा होण्यास सुरवात झाली आहे. 

तालुक्‍यातील कोर्टी, राजुरी, सावडी, कुंभारगाव भागात अद्याप पाऊस झाला नव्हता, या पावसाने दिलासा दिला आहे. बार्शी तालुक्‍यात गेल्या तीन दिवसांपासून चित्रा नक्षत्राने दमदार हजेरी लावली. या पावसाने तालुक्‍याला अक्षरशः झोडपून काढले. सकाळी उन्ह आणि दुपारी पाऊस अशी स्थिती गेल्या दोन-तीन दिवसांपासून आहे. बार्शी,  वैराग, आगळगाव, उपळेदुमाला, गौडगाव,  पांगरी, पानगाव, नारी, सुर्डी, खांडवी आदी भागात पावसाचा जोर होता. पंढरपुरातही तुंगत, देगाव, अजनसोंड, सुस्ते भागात पावसाने हजेरी लावली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com