सोलापुरात मेथी, कोथिंबिरीसह वांगी, घेवड्याला उठाव

सोलापूर ः सोलापूर कृषी उत्पन्न बाजार समितीच्या आवारात गतसप्ताहात मेथी, कोथिंबिरीसह वांगी, घेवड्याला चांगला उठाव मिळाला. त्यामुळे त्यांच्या दरातही तेजी राहिली, असे बाजार समितीच्या सूत्रांकडून सांगण्यात आले.

बाजार समितीच्या आवारात गतसप्ताहात मेथी आणि कोथिंबिरीच्या प्रत्येकी ८ ते १० हजार पेंढयांपर्यंत रोजची आवक राहिली. तर वांग्यांची २० ते ४० क्विंटल आणि घेवड्याची १० ते १५ क्विंटल अशी आवक राहिली. गेल्या पंधरवड्यापासून त्यांच्या आवकेत आणि दरात चढ-उतार होत आहे.

या सप्ताहात मात्र काहीशी तेजी राहिली. मेथीला शंभर पेंढ्यांसाठी ८०० ते १३०० रुपये, कोथिंबिरीला ९०० ते १५०० रुपये आणि वांग्यांना प्रतिक्विंटलला किमान १००० रुपये, सरासरी २००० रुपये आणि सर्वाधिक ३००० हजार रुपये, तर घेवड्याला किमान ३००० रुपये, सरासरी ३५०० रुपये आणि सर्वाधिक ४००० रुपये असा दर मिळाला.

त्याशिवाय हिरवी मिरची, काकडीलाही मागणी वाढली.  हिरव्या मिरचीला प्रतिक्विंटलला किमान १००० रुपये, सरासरी १५०० रुपये आणि सर्वाधिक २५०० रुपये, तर काकडीला प्रतिक्विंटलला किमान १००० रुपये, सरासरी २००० रुपये आणि सर्वाधिक ८००० रुपये असा दर मिळाला.

टोमॅटो आणि सिमला मिरचीचे दर पुन्हा स्थिर राहिले. त्यांची आवकही तशी जेमतेम राहिली. टोमॅटोला प्रतिक्विंटलला किमान २०० रुपये, सरासरी ७०० रुपये आणि सर्वाधिक १३०० रुपये, तर सिमला मिरचीला प्रतिक्विंटलला किमान ६०० रुपये, सरासरी ८०० रुपये आणि सर्वाधिक १५०० रुपये असा दर मिळाला. 

कांद्याचे दर स्थिर

कांद्याची आवक आणि दर या सप्ताहात पुन्हा जैसे थेच राहिले. कांद्याची आवक प्रतिदिन ५० ते ६० गाड्यांपर्यंत राहिली. परंतु मागणीच्या तुलनेत कमीच आवक राहिली. त्यामुळे दर काहीसे स्थिर राहिले. कांद्याला प्रतिक्विंटलला किमान २०० रुपये, सरासरी १००० रुपये आणि सर्वाधिक २३०० रुपये असा दर मिळाल्याचे सांगण्यात आले.