सोलापुरात हिरवी मिरची, टोमॅटोच्या दरात सुधारणा

सोलापूर ः सोलापूर कृषी उत्पन्न बाजार समितीच्या आवारात गतसप्ताहात हिरवी मिरची, टोमॅटो, कोथिंबिरीचे दर वधारलेलेच राहिले. गेल्या पंधरवड्यापासून त्यांच्या आवकेत सातत्याने घट होत आहे. त्याचा परिणाम दरावर झाल्याचे दिसून आले. तसेच कांद्याचे दरही या सप्ताहात पुन्हा टिकून राहिल्याचे बाजार समितीच्या सूत्रांकडून सांगण्यात आले.

बाजार समितीच्या आवारात गतसप्ताहात हिरव्या मिरचीची आवक रोज ५० ते ८० क्विंटल, टोमॅटोची ४०० ते ५०० क्विंटल आणि कोथिंबिरीची आवक १० ते १२ हजार पेंढ्यापर्यंत राहिली. ही सगळी आवक स्थानिक भागातून झाली. पण गेल्या पंधरवड्यापासून त्यांच्या या आवकेत सातत्य नाही. शिवाय ती कमी-जास्त होत आहे. पण दुसरीकडे बाजारात मागणी वाढत असल्याने पुरवठा आणि मागणीत तुटवडा निर्माण होत असल्याने त्यांचे दर पुन्हा वधारलेलेच राहिले. 

हिरव्या मिरचीला प्रतिक्विंटलला किमान २००० रुपये, सरासरी ३००० रुपये आणि सर्वाधिक ४००० रुपये, टोमॅटोला किमान ७०० रुपये, सरासरी १५०० रुपये आणि सर्वाधिक ३००० रुपये दर मिळाला. कोथिंबिरीला शंभर पेंढ्यासाठी किमान ७०० रुपये, सरासरी १५०० रुपये आणि सर्वाधिक २००० रुपये असा दर मिळाला. त्याशिवाय वांगी, कोबी आणि गवारलाही चांगली मागणी वाढली. त्यांचे दरही काहीसे तेजीतच पण टिकून होते. त्यांची आवकही प्रत्येकी ५ ते ६० क्विंटलपर्यंत राहिली. 

वांग्याला प्रतिक्विंटलला किमान ४०० रुपये, सरासरी १५०० रुपये आणि सर्वाधिक २५०० रुपये, कोबीला किमान ९०० रुपये, सरासरी ११०० रुपये आणि सर्वाधिक १५०० रुपये तर गवारला किमान २००० रुपये, सरासरी ३००० रुपये आणि सर्वाधिक ४००० रुपये असा दर मिळाला. 

भाजीपाल्यामध्ये कोथिंबिरीशिवाय मेथी, चुका आणि पालकालाही चांगला उठाव मिळाला. त्यांचे दरही टिकून होते. त्यांची आवकही प्रत्येकी ५ ते दहा हजार पेंढ्यांपर्यंत राहिली. मेथीला शंभर पेंढ्यांसाठी १००० ते १२०० रुपये, चुक्याला ४०० ते ५०० रुपये, शेपूला ४०० ते ७०० रुपये आणि पालकाला ३०० ते ४०० रुपये असा दर मिळाला. कांद्याची आवक पुन्हा कमीच राहिली. रोज १० ते ३० गाड्यापर्यंत राहिली. पण कांद्याच्या दरातील सुधारणा बाजारावर परिणाम करणारी ठरली. सध्या कांद्याचे दर आणि मागणीही टिकून आहे. कांद्याला प्रतिक्विंटलला किमान १०० रुपये, सरासरी ९०० रुपये आणि सर्वाधिक १८०० रुपये असा दर मिळाला.