सोलापुरात मेथी, शेपू, कोथिंबिरीचे दर पुन्हा तेजीत

सोलापूर ः सोलापूर कृषी उत्पन्न बाजार समितीच्या आवारात गतसप्ताहात मेथी, शेपू, कोथिंबिरीची आवक मागणीच्या प्रमाणात अगदीच कमी राहिली; पण चांगला उठाव असल्याने दरातील तेजी टिकून राहिल्याचे बाजार समितीच्या सूत्रांकडून सांगण्यात आले.

बाजार समितीच्या आवारात गत सप्ताहात रोज मेथीची सात हजार पेंढ्या, कोथिंबिरीची ३ हजार पेंढ्या, तर शेपूची आवक ४ हजार पेंढ्यांपर्यंत राहिली. गेल्या दोन आठवड्यांपासून भाज्यांची आवक आणि दरात किरकोळ चढ-उतार वगळता दर तेजीत आणि टिकून आहेत. भाज्यांची सगळी आवक ही स्थानिक भागातूनच झाली. 

मेथीला शंभर पेंढ्यांसाठी ७०० ते १२०० रुपये, कोथिंबिरीला ८०० ते १३०० रुपये आणि शेपूला ४०० ते ६०० रुपये असा दर मिळाला. त्याशिवाय टोमॅटो, वांगी आणि ढोबळी मिरची यांच्या दरातील तेजीही टिकून राहिली. टोमॅटोची आवक २० ते ५० क्विंटल, वांग्याची ६० ते ८० क्विंटल आणि ढोबळी मिरचीची आवक १० ते १५ क्विंटलपर्यंत जेमतेम राहिली. 

टोमॅटोला प्रतिक्विंटलला किमान २०० रुपये, सरासरी ६०० रुपये आणि सर्वाधिक १३०० रुपये, वांग्याला किमान ३०० रुपये, सरासरी १३०० रुपये आणि सर्वाधिक २५०० रुपये तर ढोबळी मिरचीला किमान १००० रुपये, सरासरी  १२०० रुपये आणि सर्वाधिक १६०० रुपये असा दर मिळाला. 

भेंडी आणि गवारीचे दरही या सप्ताहात पुन्हा तेजीत राहिले. भेंडीला प्रतिक्विंटलला किमान ५०० रुपये, सरासरी २००० रुपये आणि सर्वाधिक ३००० रुपये तर गवारला किमान १५०० रुपये, सरासरी ३००० रुपये आणि सर्वाधिक ४००० रुपये असा दर मिळाला.