सोलापूर जिल्ह्यातील पाच नळपाणी योजना चालणार सौरपंपावर

सोलापूर : प्रादेशिक पाणीपुरवठा योजनेचे पाणी विद्युतपंपाऐवजी सौरपंपाने उचलण्यात येईल. जिल्ह्यातील पाच प्रादेशिक पाणीपुरवठा योजनांसाठी ३४ लाख ७० हजार रुपयांच्या निधीतून सौरसंच बसविण्यात येणार आहेत. जिल्हा परिषदेच्या नुकत्याच झालेल्या जलव्यवस्थापन समितीच्या बैठकीत सौरपंपावर पाणीपुरवठा योजना कार्यान्वित करण्याबाबत चर्चा झाली.

प्रादेशिक पाणीपुरवठा योजनांमधील काही ग्रामपंचायतींनी पाण्याची पर्यायी व्यवस्था केली आहे. पण, उन्हाळ्यात पाणीटंचाई वाढल्यावर प्रादेशिक पाणीपुरवठा योजनांचा वापर मोठ्या प्रमाणात वाढतो. पण, थकीत वीजबिलांमुळे प्रादेशिक पाणीपुरवठा योजना बंद राहतात. थकीत वीजबिलासाठी शासनाकडे मदतीची मागणी करणे, पैशांची जुळवाजुळव करण्यातच ग्रामपंचायतींची धावपळ होते. त्यावर सौरऊर्जा हा प्रभावी उपाय ठरू शकतो. 

वीजबिलावर होणाऱ्या खर्चातून योजनेची देखभाल दुरुस्तीतही वेळेत होईल, या उद्देशाने सौरऊर्जेचा वापर करण्याचा निर्णय झाला. त्यानुसार पंढरपूर तालुक्यातील नांदुरे, मंगळवेढा तालुक्यांतील निंबोणी, मोहोळ तालुक्यांतील शेटफळ, अक्कलकोट तालुक्यांतील जेऊर व उत्तर सोलापूरमधील राळेरास या पाच प्रादेशिक पाणीपुरवठा योजनांचे विद्युतपंप सौरऊर्जेवर करण्यात येणार आहेत.

दुरुस्तीसाठीही दिला निधी

शेटफळ (ता. मोहोळ) येथील प्रादेशिक पाणीपुरवठा योजनेतील पंप मशिनरीच्या दुरुस्तीसाठी दोन लाख ९९ हजार रुपयांच्या खर्चास मंजुरी देण्यात आली. कुंभारी प्रादेशिक पाणीपुरवठा योजनेला हिप्परगा तलावातून पाणीपुरवठा करण्यात येतो. यापूर्वी तलावात पाणी नसल्याने योजना बंद होती. पण, सध्या तलाव भरला आहे. त्यामुळे दक्षिण सोलापूर तालुक्यातील मुळेगाव तांडा येथील पंप मशिनरी दुरुस्तीसाठी १४ लाख १० हजार ६११ रुपयांच्या निधी खर्चाला समितीच्या बैठकीत मंजुरी देण्यात आली.