पीकविमा प्रश्‍न आठ दिवसांत सोडवा : `स्वाभिमानी`ची मागणी

सोलापूर : शेतकऱ्यांनी विमा काढावा, यासाठी केंद्र सरकार एकीकडे कोट्यवधींच्या जाहिराती करत आहे. विम्याची रक्‍कम बॅंकेत भरून देखील बॅंकांच्या चुकीमुळे, विमा कंपन्यांच्या ढिसाळ कारभारामुळे शेतकऱ्यांना सरकारी कार्यालयाचे उंबरठे झिजवावे लागत आहेत. हा प्रश्‍न आठ दिवसांत सोडवा, अन्यथा जिल्हाधिकारी कार्यालयासमोर आंदोलन करण्यात येईल, असा इशारा स्वाभिमानी शेतकरी संघटनेने दिला.

स्टेट बॅंक ऑफ इंडिया, युनियन बॅंक ऑफ इंडिया आणि बॅंक ऑफ इंडिया या तीन बॅंकांच्या ढिसाळ कारभारामुळे सांगोला, पंढरपूर व माढा तालुक्‍यातील शेतकरी विम्यापासून वंचित राहिले आहेत. विमा कंपनी आणि राष्ट्रीयकृत बॅंका शेतकऱ्यांना दाद देत नाहीत. त्यामुळे निराश शेतकरी आता जिल्हाधिकारी कार्यालय व कृषी विभागाच्या कार्यालयाची वाट धरू लागले आहेत.

माढा तालुक्‍यातील शेतकऱ्यांनी विम्याची भरलेली रक्कम परत त्यांच्या खात्यावर जमा झाल्याची तक्रार केली. ती घेऊन स्वाभिमानी शेतकरी संघटनेचे जिल्हा कार्याध्यक्ष शिवाजी पाटील यांनी जिल्हाधिकारी कार्यालयात धाव घेतली.

माढा तालुक्‍यातील काही शेतकऱ्यांनी विम्याची रक्कम चुकीच्या खात्यावर भरल्याने त्यांना या योजनेचा लाभ घेता आला नाही. त्यांना या योजनेचा लाभ द्यावा, अशी मागणी यावेळी करण्यात आली. सांगोला आणि पंढरपुरातही असेच काही प्रकार घडले आहेत, असेही त्यांनी सांगितले.