मराठवाड्यातील चार जिल्ह्यांत चारा छावण्यांची संख्या घटली

औरंगाबाद  ः दुष्काळाच्या पार्श्वभूमीवर मराठवाड्यातील चार जिल्ह्यांत सुरू करण्यात आलेल्या चारा छावण्यांमधील जनावरांची व छावण्यांच्या संख्येतील घट कायम आहे. गत चार दिवसांत चार जिल्ह्यांतील चारा छावण्यांची संख्या ५० ने कमी झाली असून छावण्यांमधील जनावरांची संख्या जवळपास ५१ हजारांनी घटली आहे. पावसाचा कालावधी जवळ येत असल्याने चारा छावण्यांमधील जनावरांची व पर्यायाने चारा छावण्यांची संख्या कमी होत असल्याचे सूत्रांनी सांगितले.

प्राप्त माहितीनुसार, १० जूनपर्यंत औरंगाबाद, जालना, उस्मानाबाद व बीड या जिल्ह्यांत यंदा दुष्काळाच्या पार्श्वभूमीवर ११४८ चारा छावण्यांना मंजुरी देण्यात आली होती. मात्र प्रत्यक्षात ७४५ चारा छावण्या सुरू होत्या. त्यामध्ये मोठी ४,६१,५९४ तर लहान ४२,१३० अशी एकूण ५,०३,७२४ जनावरे चारा व पाण्याच्या सोयीसाठी आश्रयाला होती. १४ जूनअखेर चारा छावण्यांची संख्या घटून ६९५ वर आली तर सुरू असलेल्या या छावण्यांमधील जनावरांची संख्या ४ लाख ५३ हजार २६३ वर आली. ही संख्या पाहता चारा छावण्यांची संख्या चार दिवसांत ५० ने कमी झाली. मराठवाड्यात छावणीतील जनावरांची संख्या ५१ हजार ४६१ ने कमी झाली. 

कमी झालेल्या छावण्यांच्या संख्येत औरंगाबाद जिल्ह्यातील ३, जालनामधील ३, उस्मानाबादमधील ३ तर बीड जिल्ह्यातील ४१ चारा छावण्यांचा समावेश आहे. छावणीतील कमी झालेल्या जनावरांमध्ये औरंगाबाद जिल्ह्यातील ५९७८, जालनामधील ३७७४, बीडमधील सर्वाधिक ४०१९५ तर उस्मानाबाद जिल्ह्यातील सर्वांत कमी १५१४ लहान-मोठ्या जनावरांचा समावेश आहे.