नांदेड जिल्ह्यात साडेसात लाख हेक्टरवर पेरा

नांदेड ः यंदा नांदेड जिल्ह्यातील खरिपाच्या पेरणी क्षेत्राने सर्वसाधारण क्षेत्राचा टप्पा पार केला आहे. बुधवार (ता. २९) पर्यंत ७ लाख ५५ हजार १८ हेक्टरवर (१०१.६४ टक्के) पेरणी झाली आहे. यंदाच्या खरिपातील जिल्ह्यातील एकूण पेरणी क्षेत्रापैकी सोयाबीनचे पेरणी क्षेत्र ५०.५१ टक्के आहे. एकूण कडधान्य आणि गळित धान्य पिकांची पेरणी सर्वसाधारण क्षेत्रापेक्षा अधिक झाली आहे, अशी माहिती जिल्हा अधीक्षक कृषी अधिकारी रविशंकर चलवदे यांनी दिली.

यंदाच्या खरीप हंगामातील पिकांचे सर्वसाधारण क्षेत्र ७ लाख ४२ हजार ८६१ हेक्टर प्रस्तावित करण्यात आले होते. बुधवार (ता. २९) पर्यंतच्या पेरणी क्षेत्रामध्ये ज्वारीची ५३ हजार २५० पैकी ३१ हजार ४८१ हेक्टरवर (५९.१२ टक्के), बाजरीची ३३ पैकी २१ हेक्टर (६३.६४ टक्के), मक्याची ६४९ पैकी ६९१ हेक्टरवर (१०६.४७ टक्के), भाताची ८५८ पैकी ९२० हेक्टर (१०७.२३ टक्के) , तुरीची ६० हजार ७८८ पैकी ७२ हजार ५१०  हेक्टर (११९.२८ टक्के), मुगाची २६ हजार ८९३ पैकी २५ हजार ८५९  हेक्टर (९६.१६ टक्के), उडदाची २८ हजार ६०८ पैकी २६ हजार ९४२ (९४.१८ टक्के), सोयाबीनची ३ लाख ९ हजार ३७५ पैकी ३ लाख ८१ हजार ३७३ हेक्टर (१२३.२७ टक्के), तिळाची ७९९ पैकी ४५५ हेक्टर (५६.९५ टक्के), कारळाची ४७१ पैकी २८२ हेक्टर (५९.८७ टक्के) समावेश आहे.

कपाशीची २ लाख ६० हजार ५०५ पैकी २ लाख १४ हजार ४१० हेक्टर (८२.३१ टक्के) लागवड झाली आहे. तृणधान्याची एकूण ३३ हजार ११३ हेक्टरवर (६०.१६ टक्के), कडधान्यांची १ लाख २५ हजार ३११ हेक्टर (१०७.६१ टक्के), गळित धान्यांची ३ लाख ८२ हजार १८४ हेक्टरवर (१२२.९४ टक्के) पेरणी झाली आहे. अर्धापूर, मुदखेड, धर्माबाद, देगलूर, बिलोली, मुखेड, कंधार, लोहा या आठ तालुक्यांमध्ये सर्वसाधारण क्षेत्रा पेक्षा अधिक हिमायतनगर तालुक्यात सर्वसाधारण क्षेत्राएवढी  पेरणी झाली आहे. इतर सहा तालुक्यांमध्ये ९६.३३ ते ९७.०४ टक्के पेरणी झाली आहे.