सिन्नर तालुक्यात ‘बीबीएफ’ तंत्रज्ञानाद्वारे पेरणी प्रात्यक्षिक

नाशिक : कृषी संजीवनी सप्ताहांतर्गत सिन्नर तालुक्यातील मोह येथे कृषी विभाग व कृषी विज्ञान केंद्र नाशिक यांच्या संयुक्त विद्यमाने बीबीएफ तंत्रज्ञानाद्वारे सोयाबीन ‘फुले कल्याणी’ या जातीचे ब्रीडर बियाणे पेरणी प्रात्यक्षिक शेतकऱ्यांना करून दाखविण्यात आले.

२००९ पासून या गटामध्ये १५ शेतकरी कुटुंबे जोडलेली आहेत. पारंपरिक पद्धतीला फाटा देऊन आधुनिक पद्धतीने बिजोत्पादन कार्यक्रम सुरू आहे. या ठिकाणी नवनवीन वाणांची ओळख करून दिली आहे. यासाठी चालू वर्षी कृषी विज्ञान केंद्र नाशिक यांच्याकडून ४५० किलो बियाणे उपलब्ध करून देण्यात आले आहे. त्याची १५ एकर क्षेत्रावर बीबीएफ पद्धतीने पेरणी करण्यात आली आहे.

येथील संजीवनी शेतकरी गटाच्या माध्यमातून बिजोत्पादन घेण्यासाठी शेतकरी अरुण भिसे यांच्या शेतावर हे आयोजन करण्यात आले होते. या वेळी निफाड उपविभागीय कृषी अधिकारी गोकूळ वाघ, तालुका कृषी अधिकारी अण्णासाहेब गागरे, कृषी विज्ञान केंद्र नाशिकच्या कृषी अभियांत्रिकी शाखेचे विषय विशेषज्ञ डॉ. राजाराम पाटील, कृषी विद्या शाखेचे विषय विशेषज्ञ डॉ. प्रकाश कदम यांनी शेतकऱ्यांना मार्गदर्शन केले.

या वेळी मंडळ कृषी अधिकारी महेश वेठेकर, मोहचे सरपंच सोमनाथ बोडके, संजीवनी शेतकरी बचत गटाचे अध्यक्ष सुनील भिसे, रामदास भिसे, किरण बोराडे, भारत बोडके, पांडुरंग भिसे, भगवान झाडे, संदीप भिसे, गोरख भिसे हे उपस्थित होते.