जळगाव ः खानदेशात पेरणी जवळपास पूर्ण होत आली आहे. सुमारे ९० टक्के क्षेत्रावर पेरणी झाली असून, मागील दोन-तीन दिवसांत अनेक भागांत पाऊस झाला आहे. वाफसा स्थितीत मिळताच कडधान्य, तृणधान्य व कापूस पिकात आंतरमशागतही सुरू आहे.
आंतरमशागत उरकून लागलीच रासायनिक खतांची मात्राही शेतकरी देत आहेत. तापी, गिरणाकाठी काही भागात तर उडीद, मूग पिकात दुसऱ्यांदा आंतरमशागत सुरू झाली आहे. धुळे जिल्ह्यातील शिंदखेडा, शिरपूर भागात सर्वच पिकांची स्थिती बरी आहे. जळगाव जिल्ह्यात जळगाव, भुसावळ, जामनेर, बोदवड, यावल भागात ज्वारी, मूग, सोयाबीन ही पिके मोडण्याची वेळ आली. नव्याने पेरणीदेखील झाली. नंतर पाऊस आल्याने ही पेरणी यशस्वी झाल्याची स्थिती आहे.
जळगाव जिल्ह्यात सुमारे ९२ टक्के, धुळ्यात ९० टक्के तर नंदुरबारातही ९२ टक्‍क्‍यांपर्यंत पेरणी पूर्ण झाली आहे. कापसाची लागवड सर्वाधिक झाली असून, ती सुमारे साडेआठ लाख हेक्‍टरवर झाली आहे. पूर्वहंगामी कापूस लागवडही सुमारे ६० ते ७० हजार हेक्‍टरवर खानदेशात झाली आहे.
कांद्यासाठी क्षेत्र नापेर खरिपातील कांद्याची लागवड ऑगस्टच्या मध्यापासून सुरू होणार आहे. यामुळे संबंधित क्षेत्र शेतकऱ्यांनी नापेर ठेवले आहे. त्यात मशागत करून घेतली जाते. तसेच कांदा रोपवाटिकादेखील या क्षेत्रात तयार केल्या आहेत. खानदेशात सुमारे १२ ते १४ हजार हेक्‍टरवर खरिपातील कांद्याची लागवड अपेक्षित आहे. कांदा लागवडीनंतर खानदेशातील नापेर क्षेत्र आणखी कमी होणार आहे. तसेच या आठवड्यात बाजरी, तागाची पेरणीदेखील पूर्ण होणार आहे. यामुळे खानदेशातील पेरणीची टक्केवारी वाढणार आहे.
पाच टक्के क्षेत्र नापेर राहणार खानदेशात पेरणी ९० टक्‍क्‍यांवर पोचलेली असली तरी किमान पाच ते सहा टक्के क्षेत्र नापेर राहू शकते. या क्षेत्रात रब्बी हंगामात ज्वारी, हरभरा यांची पेरणी केली जाईल. काही शेतकऱ्यांनी जमिनीचा पोत टिकून राहावा यासाठी क्षेत्र नापेर ठेवण्याचे नियोजन केले आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.