परभणीत सरासरीपेक्षा जास्त क्षेत्रावर होणार पेरणी

परभणी : जिल्ह्यातील यंदाच्या रब्बी हंगामातील विविध पिकांची प्रतिहेक्टरी उत्पादकता कृषी विभागाने प्रस्तावित केली. त्यानुसार हरभऱ्याची उत्पादकता प्रतिहेक्टरी ९ क्विंटल ३८ किलो, ज्वारीची १४ क्विंटल ९८ किलो, गव्हाची २२ क्विंटल १३ किलो, करडईची ७ क्विंटल १ किलो एवढी उत्पादकता प्रस्तावित करण्यात आल्याची माहिती कृषी विभागाच्या सूत्रांनी दिली.

जिल्ह्यात रब्बी पिकांचे सरासरी क्षेत्र २ लाख ७० हजार ७१२ हेक्टर आहे. गतवर्षी दुष्काळामुळे सरासरी क्षेत्रात १ लाख ६ हजार ४४६ हेक्टरने घट होऊन १ लाख ६८ हजार ४५९ हेक्टरवर पेरणी झाली. गतवर्षी ज्वारीची प्रतिहेक्टरी उत्पादकता ७ क्विंटल ८४ किलो, गव्हाची प्रतिहेक्टरी २० क्विंटल ११ किलो, हरभऱ्याची ७ क्विंटल ५ किलो, करडईची ६ क्विंटल २८ किलो एवढी आली होती. यंदा गतवर्षीपेक्षा जास्त पाऊस झाल्यामुळे, जायकवाडीचे पाणी मिळणार असल्याने जिल्ह्यातील रब्बीच्या क्षेत्रात ४ हजार ७६३ हेक्टरने वाढ प्रस्तावित करण्यात आली आहे.

यंदा २ लाख ७५ हजार ४७५ हेक्टरवर रब्बीची, त्यात ज्वारीची १ लाख १४ हजार हेक्टरवर पेरणी प्रस्तावित आहे. ज्वारीची प्रतिहेक्टरी उत्पादकता १४ क्विंटल ९८ किलो, गव्हाची ३६ हजार हेक्टरवर पेरणी; तर उत्पादकता २२ क्विंटल १३ किलो, हरभऱ्याची १ लाख १३ हजार २४० हेक्टरवर पेरणी, प्रतिहेक्टरी उत्पादकता ९ क्विंटल ३८ किलो, करडईची २ हजार ५०० हेक्टरवर पेरणी, प्रतिहेक्टरी उत्पादकता ७ क्विंटल १ किलो अपेक्षित आहे.

२०१४-१५ ते २०१८-१९ या पाच वर्षांत ज्वारीची सरासरी उत्पादकता प्रतिहेक्टरी ७ क्विंटल ८१ किलो, गव्हाची १३ क्विंटल ८२ किलो, हरभऱ्याची ६ क्विंटल १२ किलो, करडईची प्रतिहेक्टरी उत्पादकता ४ क्विंटल ७२ किलो आली होती. यंदा जमिनीतील उपलब्ध ओलावा, सिंचनासाठी पाण्याची उपलब्धता लक्षात घेऊन या प्रमुख रब्बी पिकांच्या उत्पादकतेत वाढ अपेक्षित आहे.