नाशिक जिल्ह्यात सोयाबीन बियाण्याची चढ्या दराने विक्री 

अनेक शेतकऱ्यांनी यंदा सोयाबीन पेरणीला पसंती दिली आहे. मात्र, सोयाबीन बियाण्यांचा तुटवडा असल्याने अनेक खासगी कंपन्यांचे बियाणे विक्रेते चढ्या दराने विक्री करत असल्याच्या तक्रारी समोर येत आहेत.
soybean
soybean

नाशिक : अनेक शेतकऱ्यांनी यंदा सोयाबीन पेरणीला पसंती दिली आहे. मात्र, सोयाबीन बियाण्यांचा तुटवडा असल्याने अनेक खासगी कंपन्यांचे बियाणे विक्रेते चढ्या दराने विक्री करत असल्याच्या तक्रारी समोर येत आहेत. कृषी विभाग याकडे डोळेझाक करत असल्याचा शेतकऱ्यांनी आरोप केला आहे. 

मृग नक्षत्राच्या अगोदरच पावसाने जिल्ह्यात हजेरी लावल्याने अनेक शेतकऱ्यांनी पेरणीच्या तयारीला सुरुवात केली आहे. इतर गळीत धान्य पिके कमी होत असताना सोयाबीनचे क्षेत्र वाढते आहे. मात्र, एकीकडे बियाणे तुटवडा, गुणवत्तेचा प्रश्न असताना बियाणे दरवाढ शेतकऱ्यांसाठी अडचणीची आहे. त्यात चढ्या दराने विक्री करून कोंडी केली जात आहे.  विक्रेते छापील किमतीपेक्षा जास्त दराने बियाणे विक्री करत आहेत. मात्र, या व्यवहारात बिले छापील किमतीची दिले जात आहेत. तर त्यापेक्षाही अधिक दर घेतले जात असल्याने शेतकऱ्यांनी संताप व्यक्त केला आहे. काही शेतकरी पुढे येऊन बोलत नसल्याचा विक्रेते फायदा घेत असल्याचा शेतकऱ्यांमध्ये सूर आहे. 

नाव न सांगण्याच्या अटीवर एका शेतकऱ्याने सांगितले की, निफाड येथे एका खासगी कंपनीचे बियाणे ३४५० रुपये ३० किलो बॅगप्रमाणे असताना विक्रेते ३८०० ते ४००० प्रमाणे विक्री करत आहेत. त्यामुळे शेतकरी आर्थिक अडचणीत असताना पुन्हा दरवाढीच्या या त्रासाला सामोरे जावे लागत असल्याचे चित्र आहे.  कृषिमंत्र्यांकडे फोनवरून तक्रार  बियाणे तुटवड्याचा फायदा घेत विक्रेते चढ्या दराने बियाणे विकत आहेत. त्यामुळे या प्रकाराबाबत शेतकऱ्यांनी कृषिमंत्री दादा भुसे यांना संपर्क करत तक्रार केली. मात्र, सविस्तर माहिती द्यावी कारवाई करू, असे त्यांनी सांगितले. मात्र, आता तरी कृषी विभाग जागा होणार का? असा संतप्त सवाल शेतकरी करत आहेत.  प्रतिक्रिया  बिले छापील किमतीची दिली जात आहेत. मात्र, १० ते १५ टक्के जास्त रक्कम घेतली जात आहे. साठा व बियाणे उपलब्धता कमी असल्याची कारणे देऊन लूट केली जात आहे. खासगी कंपनीच्या बियाण्यांत लूट जास्त आहे.  - ज्ञानेश्वर कांगुणे, सोयाबीन उत्पादक, दरसवाडी, ता. चांदवड  चौकशी केली तर बियाणे वेळेवर भेटले नाही. काही ठिकाणी उपलब्ध असताना अनेकजण साठा नसल्याचे कारण देत टाळत होते. मात्र, काही शेतकऱ्यांना चढ्या दराने देऊन विक्री केली आहे.  - प्रवीण खुटे, सोयाबीन उत्पादक, पिंपळगाव नजीक, ता. निफाड   

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com