नांदेड जिल्ह्यात ‘शेतकरी मानधन’ची विशेष मोहीम सुरू

नांदेड :‘‘जिल्ह्यातील अल्प आणि अत्यल्प भू- धारक शेतकरी कुटुंबीयांना वृध्दापकाळात प्रत्येक महिन्याला आर्थिक मदत मिळावी, यासाठी पंतप्रधान शेतकरी मानधन योजना सुरू करण्यात आली आहे. या योजनेच्या अमंलबजावणीसाठी शुक्रवार (ता. २३) ते रविवार (ता. २५) या कालावधीत जिल्ह्यातील प्रत्येक गावामध्ये पात्र शेतकऱ्यांच्या नोंदणी शिबिराचे आयोजन करण्यात आले आहे. जास्तीत जास्त शेतकऱ्यांनी या योजनेचा लाभ घ्यावा’’, असे आवाहन जिल्हाधिकारी अरूण डोंगरे यांनी केले.

केंद्र शासनाची महत्त्वाकांक्षी योजना असल्याने अंमलबजावणीसाठी जिल्हा प्रशासन सरसावले आहे. रविवारपर्यंत योजनेची नोंदणी, तसेच प्रभावी अंमलबजावणीसाठी विशेष मोहीम राबविण्यात येत आहे. त्याअंतर्गत तलाठी, ग्रामसेवक, कृषी सहायक या ग्रामस्तरीय अधिकाऱ्यांच्या सहभागातून लाभार्थ्यांची नोंदणी करण्यात येत आहे.

१८ ते ४० वयोगटातील २ हेक्टर पेक्षा कमी जमीन धारणा असणारे शेतकरी या योजनेसाठी पात्र आहेत. आपले सरकार सेवा केंद्रावर एक साधा अर्ज, बँक पासबुक, आधार ओळखपत्र, नमुना ८ अ चा उतारा सादर केल्यानंतर नोंदणी पूर्ण होणार आहे. या वेळी कोणतीही रोख रक्कम लगेच भरण्याची आवश्यकता नाही. योजनेसाठी लाभार्थ्याचे अंशदान त्याच्या खात्यातून आपोआप जमा करण्यात येईल. तेवढे अंशदान केंद्र सरकारकडून विमा महामंडळाकडे जमा करण्यात येईल.

वयाची ६० वेर्ष पूर्ण होताच लाभार्थ्यांना प्रतिमहिना ३ हजार रुपये मानधन मिळण्यास सुरवात होईल. एकाच कुटुंबातील अनेकजण या योजनेत सहभागी होऊ शकतात. तथापी त्यासाठी प्रत्येकाने स्वतंत्रपणे अंशदान भरावे लागेल. ते भरता आले नाही तरी जमा रक्कम व्याजासह मिळण्याची सोय या योजनेत आहे. ही योजना प्राधान्याने अल्प व अत्यल्प जमीनधारकांसाठी आहे. 

उच्च आर्थिक उत्पन्न असलेले शेतकरी, जमीनधारण करणारी संस्था, संवैधानिक पदधारण करणारी अथवा केलेली व्यक्ती, आजी-माजी मंत्री, आमदार, खासदार, महापौर, जिल्हा परिषद अध्यक्ष, केंद्र व राज्य शासनाचे निवृत्त अधिकारी-कर्मचारी, आयकर भरणाऱ्या व्यक्ती, डॉक्टर, वकील, अभियंता, सनदी लेखापाल, वास्तुविशारद इत्यादींना या योजनेसाठी अपात्र ठरवले आहे. मात्र शासन अंगीकृत संस्था, स्वायत्त संस्थेतील व स्थानिक स्वराज्य संस्थेतील चतुर्थ श्रेणी कर्मचाऱ्यांना या योजनेचा लाभ घेता येईल, अशीही माहिती जिल्हा प्रशासनातर्फे देण्यात आली.